Rengkhawpui 24.3.12

Serlui Group YMA Conference neihna a Intihsiakna hrang hrangah Dawr veng Branch-in an ti tha ber a ni.

    Vairengte.24th.March.2012 :Dt.21.3.2012(Nilaini) atanga tan Serlui YMA Group Conference chu nizan khan a tiak a,Intihsiakna  hrang hrangah Dawr veng Branch,Bilkhawthlir ten ti tha berin pakhatna an ni.
          Tun tum Serlui Group YMA Conference ah hian Volleyball mipa leh hmeichhia,Mizo hnam lam leh Leng khawm zai hmangte a intihsiakna neih a ni.Nimin lam khan Volleyball leh hnam lam hmanga intihsiak niin Volleyball hmeichhia ah hian Venglai pakhatna an ni a,pahnihna Zalen veng leh Pathumna Bangla veng te an ni.Mipa lamah hian pakhatna Dawr veng,Bikhawthlir pahnihna Buhchang phai leh pathumna Tuitha veng, Bikhawthlir te an ni.Hnam lam intihsiakna ah hian Branch 14 telin pakhatna Kualmawi,Bilkhawthlir an ni a,pahnihna Dawr veng, Bilkhawthlir leh pathumna Hmar veng Branch ,Vairengte te an ni.Lengkhawm zai intihsiakna ah hian pakhatna Dawr veng, Bilkhaw thlir,pahnihna Venglai Branch Vairengte leh pathumna Buhchangphai te an ni.
    He Conference ah hian rorelna neih a ni a,hengte hi an thu pass te an ni.
1.Saiphai ah Excise Gate dah ni rawh se.
2.Ramri hrul a khua awmte Sawrkarin Development chak zawk a kalpui ni rawh se.
3.Group huam chhunga branch hrang hrang te Football in elna neih ni rawh se.
4.Kan rama ramhmulte hi tun aia humhalh ni rawh se.
    Nizan khan result puan a ni a,Activities inelna ah Kualmawi Branch Pakhatna an ni a,pahnihna Dawr veng Branch leh pathumna Hmar veng Branch,Vairengte te an ni.Lawmmante hi intihsiakna hrang hranga pakhatna atanga pathumna ten an dawng a,a pumpui a ti tha ber Branch chu Dawr veng Branch an ni a,amaherawhchu lawmman hi a hranin an siam lo a ni.

Camping nei dawn
  Dt.27.3.2012(Thawhlehni) hian Vairengte Presbyterian Kohhran chuan  Gospel Thunder Team ruaiin Chhandamna  Camping an buatsaih dawn a ni.A hma a an tum dan chuan Dt.26.3.2012(thawhtanni) ah Camp hi tan tum a ni a,Speaker tur Pu Zaihmingthanga (Zaitea)te hi an chhungkaw lam harsatna avangin Thawhtanni hian a lo chhuk thei dawn chauh a ni.Vawiin lam hian Counsellor leh midangte chu an rawn thleng dawn a,Camp hi Rawngbawltu Camp atanga bul tan tur a ni a,zanin atang hian Pre-Camping tan a ni dawn a ni.

Vairengte khawchhungah a rualin mithi pahnih awm
     Nimin zing dar 6:00 vel khan Pu R.Kailiana S/o Rochhuma(L) Venghlun,kum 47 chu Lungphu chawl in a boral a ni.A chhungte sawidan chuan Pu Kailiana hi zingah pawh tho in kawngkapuite pawh a hawng vek a,rei tak T,B natna in a tlakbuak tawh avangin ataksa a chak lo hle a ni.An monu zing tho chhuakin Bathroom bulah a ruang hi a va hmu ta a ni.Nimin chawhnu dar 1 :00 khan Pastor Malsawm tluanga’n a vui a,a ruang hi Thlanmual No.1 ah phum a ni.Tin, Ningni zan dar 11:00 vel khan Pu Kalala,kum 96 Field veng chu Ashma natna avangin a boral a,nimin khan Aitlang thlanmual  ah vui liam a ni ve bawk a ni.Editoroal Board te chuan Lusun chhungte kan tuarpui tak zet a ni.

Kum 2012 -2013 a Serlui Group YMA Hruaitu tharte
President    : Pu Sangliana Varte                           (Vairengte)
Vice President : Pu Lalvuana Ngente
             (Bilkhawthlir)
Secretary    : Pu H.Lalnunmawia
             (Vairengte)
Asst.Secrectary : Pu Zaithanmawia
             (Bilkhawthlir)
Treasurer    : Pu C.Lalhmachhuana
             (Buhchangphai)
Financial Secy : Pu Lalhmangaihzuala
              (Vairengte)

Motor in Ui chil
    Nimin tlai dar 5:00 bawr vel khan Venglai kawnah Bairabi lam motor 207 chuan Pu R.D-a,Hall vengte Ui chu a chil a,ui hi a hmunah hian a thi nghala ni.Ui hi Motor hnungah hian a tlan lut a,a ke hnung lamin a chil zui ta a ni.A chiltu motor hi dingin a neitute nen hian inbe remin Ui neitute hian an ngaidam a ni.

Ruang lo thleng
   Dt.22.3.2012(Ningani) a  Naga Hotel a boral Lalhruaitluangi (Matluangi) D/o Pi Neihpuii (L.P Book Store neitu) Dinthar veng Aizawl chu Silchar a Posmortem a nih hnuin a ruang hi nimin tlai dar 5:00 vel khan Vairengte a lo thleng a,Vairengte Police ten O.C hoin Police Gate ah lo hmuakin puanin an tuam a ni.

Training dawn
Dt 26(Thawhtanni) atanga 30 (Zirtawpni) chhung hian DRDA bul tumin Kolasib District chhunga Village Employment Council (VEC) member zawng zawng ten AMFU Conference Hall, Kolasib-ah training an nei dawn a,VEC member zawng zawng member zawng zawngte chu kim tak a kal vek turin an in hriattir a ni.Training hi khaw hrang hrangten a in chhawkin an nei dawn a ni.

Letter to Editor
The Editor
Rengkhawpui
Daily Newspaper

Subj : Hmalak dan a awm lo maw?

Pu Editor,

    A hnuaia ka rawn tarlan hi khawngaiha min lo chhuah sak theih chuan ka lawm hle ang.
    Hmanni lawk khan Sipai Canteen-a thil lei ho chu ‘Sabzi Bhaji’ Masala bawm hnih emaw aia tam emaw an lei tir vek a.An lei teltir hi thu hran ah ngai ila,ni hnih khat lek hnu a expire mai tur a la ni leh zel hi hriat thiam a harsa hle a ni.Engpawh nise  Sipai lehVairengte mipuite chu in pawh ho tak a cheng ho tur kan ni a,mahse hetiang lam zawnga thil thleng a awm thin hi a thalo hle in a hriat a ni.Consumer Union ho hian hma an la thei lo maw? Mirethei te te in kan thil duh leh mamawh kan leina ah dikna kan chan ve theihna Consumer Union ho kha han tang deuh teh u.
    Tunlaiin,Vairengte Retailer thenkhatah chuan Atta,Maida sem a ni leh a,a lawmawm khawp mai.Tun aia sem zin a nih theih nan hmalak theih niphei sela chu a lawmawm leh zual ngawt tur.Mahse,retailer thenkhatten tehkhawng an hman thin hi a thalo tihna ni lovin,kan tih muk a zirin a ritin a rit lo thei tihna a ni a.A rintlak aimahin a awlsam viau a nih hmel hle in ka lo hre ve mai mai.Kan venga la ho pawhin atling lo deuh an ti thei zel bawk nen,hei aia rintlak leh tehna dik zawk a awm theih tawh nan hmalak ava tha dawn ve,Enge i ngaih dan ve le?

By
Sanga pa
Vairengte

Read More

Editorial.23.3.12

        Mihringte hian kan nun dan pangngai reng hi kan ning fo thin.Kan eizawnna te,kan hnathawh te nitin a ngai reng thawh leh tih thin chu a ninawm chang a awm fo thin.Hnampui nundan a awhawm deuh thin chu, kartawpah chungkua in emaw, thiante nen emaw hmun nuam takah in tih hlimna an nei thin hi a ni.Chutiang chuan neih ve pawh tum ila,kan khua angah hi chuan han in tih hlimna hmun tur hi kan nei lo tih theih a ni a.Picnic Spot emaw Park nuam takte nei ve ila chuan hei ai chuan nun hi kan hman nuam ngei ang.Tun hnaia VC-I lamten MGNREGS hmanga kawng an siam High School tukhuah ah te sawn Picnic Spot/Park nuam tak te siam ni thei sela,a kawng hi PWD-in emaw MGNREGS sum hmangin emaw Metal vek nise la.Khua kan zauh phahna anih rualin intihhlimna hmun tha tak kan nei dawn bawk nen.Thuneitu leh khawtlang hruaitute khan hetianglam hi ngai ven ran chi a ni lo maw?

Read More

Rengkhawpui 23.3.12

Vairengte a Excise & Narcotic Department leh Police ten Joint Operation neiin zu tha hnem tak an man

    Vairengte.23rd.March.2012 :Dt.21.3.2012(Nilaini) zan dar 8:00 vel khan Vairengte Excise leh Police ten an thudawn bawhzuiin State veng pengah Gypsy Hard top  MZ 01C 7360 atangin Zu thahnem tak an man a ni.

         Heng an Zu mante hi Ralliana kum 38 S/o Zahnawka Vaivakawn Aizawl leh Vanlalpeka kum 23 S/o Rallianthanga, Phunchawng te ta a ni a,a vai hian Mc Dowell um puitling 1092,AC Black Um 27,Tuborg canned beer um 23,Royal Stage um 2 leh Kingfisher Beer um 34 te an ni. Kan thu dawnna in a sawi danin heng an zu mante hi Bhaga wineshop atanga leiin Awithang atangin an rawn tlan chho a,Phainuam atanga rawn tlan chho zelin State veng pengah hian rawn chhuah pui an tum a ni.Vaiengte Police leh Excise te hian chu chu hriain State veng peng atangin an tlan khalh a,kawng lian lai deuh ah an inpelh avangin an rawn um chho a,Excise S.I Rorelkima hian a motor kawng laiah lo site in an ti ding thei ta ni.Heng an zu man te hi motor hnungah a seat thlawnin Gypsy khat tunin an phur a ni.
    A neitu Ralliana hian sawi danin heng zu lei nan leh senso atan hian Rs 1,65,000/- vel an hmangral a ni a ti.Nimin lam khan heng an zu man leh a neitute hi Kolasib Court lamah an thawn chho nghal a.Hetiang a Vairengte Police leh Excise ten kan rama ruihhlo lo lut tur an man fo mai hi a lawmawm tak zet a ni.

 Industry Trade thlangte tan NLUP sem a ni

    Nimin khan Vairengte Comunity hall-ah Industry Trade thlangtute tan NLUP  sem a ni a,Hetiang hi Vairengte leh a chhehvel khua ah an sem dan a ni.
Village Council - I ah mi 17
Village Council - II ah mi 7
N.Chhimluang ah mi 1
Phainuam ah mi 1
Saihapui ‘V’ ah mi 1
    Nimin a an sum semchhuah zawng zawng hi a vaiin Rs 15,41,000/- a ni a,Sum hi mi hrang hrang hnenah an sem dan a in ang lova,atlangpuiin Rs 1,00,000/- atanga Rs 44,000/- vel ang a ni.Heng sumte hi a pawisa fai a pechhuak lovin Vairengte Rural Bank atanga lakchhuahna tur receipt an pe chhuak a ni.Nimin a APR(Actual Payee Receipt) la hman lote chuan Industry Office Kolasib ah APN hi lam tur a ni a,Pass book ken tel a ngai bawk a ni.
    DTP(Desktop Publishing) leh Photography & Videography te hian an dawn tur zah an dawn tawh avangin NLUP hi pek an ni tawh dawn lo a ni.Verification(endikna) hi May thla tawp emaw June thla tir lamah emaw an rawn nei leh dawn a ni.
NLUP dawngtute hian Signboard tar vek tur a ni a,A len zawng chu 12x6 a hlai a ni tur a ni.A plate rawng hi Sakhi rawng(red Oxide) a ni tur a ni a,thu ziah tur chungchangah a chung berah hian NLUP tih leh a laiah Benificiary leh a hnuai  berah aTrade hming ziah lan tur a ni.

NLUP a trade thenkhat ten an dawn lo chhan

  NLUP semtute hnen atanga thu kan dawn danin Heng Trade hrang hrang Capentry, Tailoring, Handloom, Agarbati Stick making leh Broom Stick making te hian a Khawl(Machine) a an dawn dawn avangin 2nd Instalment pek ve an nilo a ni.

OPD thu hman dawn lo

Vawiin hian Damdawiin staff te zingah innei tur an awm avangin Doctor te OPD ah an thu hman dawn lova,vawiin lamah chuan inentir theih a ni dawn lova,khawtlang mipuite hriat thiamna an ngen a ni.

Group YMA Conference report tawi

   Serlui Group YMA Conference neih mekah Palai riak a in ziak lut zawng zawng hi mi 529 an ni a,Group area chhungah Saiphai, Saiphai ‘S’ leh Phainuam te Conference ah hian an kal lo a ni.Vawiin zing dar 7:00 hian Hruaitu thlanna neih a ni anga,dar 10:00 hian Hnam lam hmangin an intihsiak dawn bawk a ni. Hmeichhe Voleyball ah hian Venglai leh Zalen vengten final an khel dawn a mipa lamah chuan Buhchang leh Bikhawthlir Dawr vengten an khel dawn bawk a ni.

Tuizem in delh

Nimin zing dar 10:00 vel khan Lorena (Khasi) kum 26,Tlangnuam veng chu Bazar chawhmeh zawrhna dawr a chawhmeh a lei lai chu a bula tuizem tluin a delh a,a ngalruh veilam a tliak a ni.He tuizem tluk chhan hi a dinna lei a ngheh loh vang leh a ban hi pakhat chauh a ni a,tui an dah khat hle bawk a ni. 

Electric in man 

Nimin khan Omit-a Cachar mi, Electric Deparment a hnathawk fapa chu Chitephai a electric line cut a tumna lamah curent in a man a,amah hi apa aikalin chitephai ah hian Jumpering cut hna a thawk a,a hma a line a cut fel vek tawh a a ngai chu zanlamah a hrui an lo hawlh zawm leh ni ngei tur a ni,Curent hruipui hian a man a ,a ke hi a hliam nasa ber a,a awmvel pawh a kang nual bawk a ni.Nimin khan Vairengte damdawiin panpui nghal a ni a,anmahni duh danin phailamah reffer an ni.

VC-II ten hna chhunzawm 

Nimin khan Village Council-II lamte chuan Step an siam mek leh leilawn an siam te an chhunzawm leh mek a,vawiin lamah hian zawh hman an in bei sei thu VCP Pu R.Lalfamkima hnen atangin thu kan dawng a ni.

Read More

Editorial.22.3.12

        Vairengte  khua hi chawimawi phute chawi mawi leh fak ngaite fak chungchangah hian kan in inlet a tha awm e.Miin khawtlang tana thil tha an tih ve chang pawhin an tih tur rengah kan dah fo thin.Kan khuaah hian chawimawi phu leh fak tlak tak te pawh an awm nual tawh a,tun hnaiah NGO pawl thenkhatten chawimawi phute chawimawi an uar tan a, a lawmawm khawp mai.A tute mai pawh hian fak derna pawh nise lawmlo kan awm lova,in sawiselna hian mihring nun a siam tha ngai lo,fak chung a fuihna dawngtu tan chuan in siam that a nuamin a chakawm zawk thin.

Read More

Rengkhawpui 22.3.12

Vairengte Chhmveng Branch YMA leh Joint MHIP  ten Hmeichhe awmtha duh lo hnamdang hnena inzuar leh an thurualpui an man.

         Vairengte.22nd.March.2012 :Dt.20.3.2012(Thawhlehni) zan dar 12:00 vel khan Chhimveng Branch YMA leh Joint MHIP tang kawp ten Mizo hmeichhia Sipai Camp a in zuar tumte leh an thurualpui mipa 1 an man.

        Kan thu dawnna in a sawi danin Vairengte Chhimveng Branch YMA te hian an thudawn bawhzuiin, Heng hmeichhe pahnih Ngursangpuii  (Ladampuia,Hall veng nupui hlui)leh a nau Jenny Vanlalneli D/o Neihthuama (L) te chu thawhtanni zan 12:00 vel khan Vairengte a Sipai training na CIJW School a hnamdang sipai lakah an inzuar ni a an hriata avangin an zawngzui a, an pahnih leh an thurualpui Lalthanliana S/o Zathanga Vairengte Stateveng, te chu hmuin thu zawhfiah turin an la a ni.
    Heng hmeichhe pahnih Vairengte a ruihhlo ngaite enkawlna Centre for Peace & Development (CPD) te pawhin rei tak an lo buaipui tawh a,Thawhtan zan khan Aizawl lam pana haw an tum chu pawisa an neih loh avangin an thianpa chuan pawisa a ngaihtuahpui a, sipai hnenah hian an inzuar ta mai niin an sawi a ni.
Nimin khan Vairengte Police, YMA leh MHIP te chuan engtia tih zui tur nge niang tia an sawiho hnuin, chhung te bulbal belhtur neilo an nih avang leh anmahni hian sim tura an intiam avangin, MHIP hruaitu te chuan Bethel Camping Centre, Chawnpui, Aizawl chu bia in, he home a dah tur hian nimin khan Aizawl an panpui ta a ni.
    MHIP leh YMA te chuan Hetianga hnamdang laka Mizo hnam leh Mizo hmeichhia te zahawmna tihbawrhban ani thin chu pawi an tih thu sawiin, hetiang kawngah hian englai pawhin tha an thlah loh tur thu leh Vairengte leh a chhehvelah hian pawisa duh vanga hnamdang laka inphal ta mai an awm fo thin a, hetiang a mizo hnam leh Mizo hmeichhia te zahawmna ti bawrhbang zawnga khawsa thin te chungah hian an khauh hle tur thu an sawi bawk  a ni.SDPO pawhin hetiang tih ching hi an awm leh a nih chuan case siam a,Jail lamah an in thawn zel tawh tur thu a sawi bawk a ni.

Thingzai thahnem tak
man a ni

       Kan thudawn nain a sawi dan chuan thawhtan zan dar 9 vel khan Vairengte Forest Department a ACF Training Mr.Vidhya Sagar IFS leh a ho te chuan an thudawn bawhzuiin Vairengte Police te nen tang kawpin Vairengte chhuahlam Saihapui (V)  bula Saihapui lui Leilawn bulah hnim kara thuhruk thingzai thahnemtak chu hmuchhuakin an mana ni. Heng thingzai te hi a neitu hriat a ni lova,an man zan hian 407 motor ah engemawzah an rawn phur chho nghal a,heng an thingman te hi atam tham deuh avangin leh motor ken hian a phurh zawh loh avangin nimin lam khan an zuk la leh a ni.A vai hian Teak thing- Cubic-30 leh Thingzai pangngai Cubic-60 a ni.
    Heng an thingman na ah hian  Vairengte Forest R.O leh Staff te chuan Police OC leh Staff te chungah lawmthu an sawi a ni.

Vairengte Oil Palm Grower Society Hriattirna

    Oil Palm chingtu zawng zawng ten Oil palm huan a chin tur Balhla leh Lakhuihthei te ching duh leh mamawh chuan Pu V.L Lawma,Hall veng hnenah Dt 25.3.12 ral hma ngeiin report tur a ni a.Hun tiam chhunga in report lote chuan an hmu thei tawh dawn lo a ni.
    Balhla  hi Hacter 1 ah 150 a sem tur a ni a,Lakhuihthei hi Hacter 1 ah 8500 a sem a ni dawn a ni.Tin,M.O.P(Leitha) tunkar chhung atan lak theih a ni bawk.

Kel hralhruk tum man

     Vairengte SDPO hnen atanga thu kan dawn danin Thawhtanni khan Pu R.Siakenga,chhim veng te kel chu Dikneiha leh Lalmuansanga te chuan ru in Bhaga lamah an keng thla a.Bhaga YMA ten ringhlelin Vairengte Police ah an report a,Police lam hian an thu dawn bawhzuiin Bhaga ah an tlan thla a,an Kel zawrh chu an lak kir sak leh a,a rutu tak Dikneiha hi a lo tlanbo hman a,tunah hian Vairengte Policeten Dikneiha hi an zawng mek a ni.

VC-I ten Component hmangin hna thawk tan

    Nimin khan Village Council-I lamte chuan MGNREGS Material Component sum atangin Dinthar veng panna kawng Pu Zahmingthanga In kawt atangin an siam tan tawh a,he kawng hi border phah hmasak phawt a ni anga,chumi zawh ah Cement a chhun leh tur a ni.Tin,Water Tanky an siam mek pawh a chhuat chhung zo tawhin a bang tur an siam leh tan mek a ni.

Awareness nei dawn

    Vawiin chawhnu dar 2:00 p.m hian Forest Department ten Vairengte Government High School ah Fire Prevention chungchang leh Nungcha humhalh chungchangah Awareness an nei dawn a ni.

Carnival nei dawn

   Vawiin zing dar 9:30 a tang hian Bus Station,Zalen ah Vairengte Zone Football Association bul tumin Carnival neih leh tur a ni a,hetiang lam a tuite chu he hunah hian lo tel ngei turin an sawm a ni.

Chini awm

   Retailer No.1 Pu Zorinsanga hnen a ration laten tunkar hian Chini a awm a,Card pangngai a la te tan a double in a lak theih dawn a,BPL card a la te tan BPL belhna a awm bawk dawn a ni.

Read More

Editorial.21.3.12

        Tunlai khawvel ah a tel lova kan awm theih lo pakhat chu mobile phone hi a ni awm e.A pawimawhna leh a hmanna tur dik taka hman anih phei chuan a tangkai thei hle a,chutihlai in tunlai hian signal thalo leh network chhia a tam thei hle thin a ni.A bikin Airtel ah ngat phei chuan vawi 2 vawi 3 te phone nawn a ngai a,inbiak lak lawh laite hian  a tawp thut leh tawng hriat theihlo leh thut thut te hi a tam em em a ni.Hetiang lam chinchang hre deuh ten ngaih ven ran chi a ni awm e.

Read More

Rengkhawpui 21.3.12

Kawngthar veng a kawngkual laiah Auto leh Tipper in su
      Vairengte.21st.March.2012 :Nimin Dt.20.3.2112(Thawhlehni) Chawhnu dar 2:00 bawr vel khan Lalnunsanga S/o Lalhmingmawia,Hall veng Auto MZ 05-2512 leh ABCI company motor AS 01DC-4126 te chu Pu R.Vana(L) inbul kawng kual laiah an in su a ni.

              He chetsualnaah hian thi leh hliam an awm lova,Auto Driver Lalnunsanga hi a ke tlemin a pem hlek a ni.ABCI motor hi Silchar lam pana tlan a ni a,Auto hi CPD Office atang lo tlan chho lam a ni.He chetsualna avang hian  Auto Rickshow hi ahmalam Glass a thlawn a,a indicator light pawh a keh  a,a hnunglam hi a sawiin a hood hi a thler nual bawk a ni.Mit a hmutute sawi dan chuan Auto rawn tlan chho hian ABCI motor hi a hnunglam ke chung zawn bangin a tai niin an sawi a ni.A hmunah hian Police lamte kal nghalin Case siam buai lova inrem mai turin an ti a,ABCI motor khaltute lam hian thiam anin tih ve tho avangin Rs 1200/- chawiin an in rem ta a ni.
    He in remna chungchangah hian  Auto neitute lam chu an lungawi chhiah lova,Rs 1200/- lek hian Auto chhia hi a siam theih dawn loh a ni an ti a.Hemi chungchang thu hi Vairengte Police Station lamah zawh chian a ni a, Duty Officer in a sawi dan chuan Case hi dan ang a ziah luh a nih chuan Auto neitute hian an thiam lo zawk dawn a,kawng sir a insakna bungrua lo dahtute nen lam hian case ah hian ziah luh an ngai dawn a ni.Vairengte O.C sawi dan in Insakna bungruate National highway kawng dal zawng a dah chungchangah D.C Order hi a la pangngai reng a,National Highway ah hian mimal bungrua leh insaknate dah phal a ni lo a ni a ti.

YMA Conference a Branch hrang hrangte kal dan tur

    Serlui Group YMA Conference a Branch hrang hrang hruaitute hnen atanga thu kan dawn danin an kal hun leh in nghahkhawmna hmun turte chu hengte hi a ni.
Chhim veng Branch
Kal hun : zing dar 9:00 a.m
Member kal tur zat 35-40 inkar vel
Innghahkhawmna : YMA Run kawtah
Field veng Branch
Kal hun : Tlai dar 3:00 p.m
Innghahkhawmna : Pu K. Lalchawi mawia  te in kawt
Member kal tur zat : 26 bawr vel
Zalen veng Branch
Kal hunzing dar 9:00 a.m
Innghahkhawmna : Zalen veng kawn
Member kal tur zat : 40 bawr vel
Bangla veng Branch
Kal hun : zing dar 10:00 a.m
innghahkhawmna : State bank kawt
Member kal tur zat : 30 vel
Venglai branch
Kal hun : zing dar 10:00 a.m
Innnghahkhawmna : Tv Logos M.S Tluanga leh Pu Zalawta te In kawt
Member kal tur zat : 35 vel
Hall veng branch
Kal hun : 12:00 Noon(Chianglo)
Innghahkhawmna : Hall peng bulah
Member kak tur zat : 30- 40 vel
Hmar veng Branch
Kal hun : Zing dar  10:00 a.m
In nghahkhawmna : Pu B.Dokunga In kawt.
Member kal tur zat :30 - 40 vel

Material Component sum la chhuak 

   Nimin khan VC-I leh VC-II ,VCP te chuan Bilkhawthlir ah MGNREGS a Material Component a hman tur 1st Instalment Rs 150000/- an la chhuak a,VC-II ,VCP Pu R.Lalfamkima hian Vairengte Higher Secondary School computer leina tur  1st instalment atan Rs 15000/- MLA Fund a tangin a dil Kolasib atangin chhuak bawk a ni.Heng material Component atanga an thil siam hmang hian Bilkhawthlir Block hnuai a VC hrang hrangten inelna an nei dawn a,he inelna a pakhatna in Rs 150000/- an dawng dawn a,pahnihna in  Rs 100000/- leh pathumna in Rs 75000/- an dawng dawn bawk a ni.

NLUP 2nd Phase dawng turte hriattirna

      Vawiin leh naktuk hian NLUP 2nd phase A.H & Vety Office,Zalen vengah sem a ni dawn a,hetah hian Voter I.D leh mahni trade thlan hmalakna tur hmun VC Pass/LSC ken tel tur a ni.Hei hi NLUP  dawngtute anmahni an awm ngei em tih leh hmalakna hmun hma an nei ngei em tih te enfiah a ni dawn a ni.Hei hi a chhan chu sawrkarin  A.H & Vety Department-te hma la tur a min tih vang a ni.
Dawng tur list hi mahni VC te hnen ah en theih a ni ang.Vety Trade chauh lo te pawh Vety office ah hian kal vek tur a ni.
Programme hi zing dar 10:00 a.m atanga tan tur a ni.
Dt.21.3.2012(Vawiin) : VC-II huam chhung a mite
Dt.22.3.2012 (Naktuk) : VC-I huam chhung a mite

          Sd/-
Dr. K.VANLALVENA
Veterinary Officer

RCH Joint Director lokal

          Nimin khan RCH Joint Director Pu Lalthanga chu Vairengte a lokal a,vawiin lam hian Vairengte Damdawiin a an hnathawh dante a hmunah a lo endik dawn a ni.Vairengte lam a endik zawh hian Bilkhawhthlir lamah a chho leh dawn a,ani hian Kolasib District chhung a damdawiin hrang hrang te a hmunah kalin a en dik mek a ni.

Art camp nei

   Nimin khan Vairengte Govt.High School te chuan CCE kal phung thar ang deuhin School naupangten Art camp an neih pui a,he camp ah hian Mipa lamten thiam hnang tah dan leh hmeichhe lamten pangpar siam dante an zir a ni.

VAirengte damdawiin a awmte

   1.Thangnunseia,kum 45
H/o Vanlalzawni
Tlangnuam
2.Lalnunsiami,kum 1 leh tla 6
D/o Lalhminghlua
Hall veng
3.Hruaizeli,kum 1 leh thla 3
D/o Timothea
Chhim veng
4.Lalrovi,kum 38
W/o Santo-a
State veng
5.Laltlankimi,kum 45
W/o Lalkhawliana
State veng
6.Vanlaldiki,kum 45
W/o Lalmuanpuia Colney
7.Lalngaihkimi,kum 50
W/o Piangruala
Tlangnuam
8.Lalruatkima,kum 2 leh thla 1
S/o Lalmalsawma
Kawngthar

VHSS Managing board inthlang

    Nizan khan Community Hall ah Vairengte Higher Secondary School Managing Board ten inthlanna an nei a,hengte hi Managing Board O.B thar te an ni.
Chairman  : Pu R.Lalfamkima (VCP.VC-II)
Vice Chairman    : Pu B.Dokunga(VCP.VC-I)
Secretary    : Pu J.Lalkima (Principal)
Asst.Secretary    : Pu C.Lalnunpuia ( Vice Principal)
Treasurer    : Pu Vanlalzuia (VCM,VC-I)
Finance Secy    : Pu R.Lawmthanga (VCM, VC-II)

Read More

Rengkhawpui 20.3,12

Vairengte Damdawi In-ah nikum hmasa lama Health Care Bill lam theih a ni

       Vairengte,20th.March.2012 :Nimin Dt19.3.2112(Thawhtanni)  a CHC Medical Officer  Pu C.Lalrinchhana hnen atanga thu kan dawn danin  nikum hmasa 2010 September leh ni kum 2011August thla chhunga Health Care bill lam theih a ni.
         Tuna Health Care Bill hi Health Care Card an siam hma a mi kha a ni a,heng a hnuai a mite hi pawisa dawng tur list te an ni a,Vawiin hian Staff Nurse Maliani bulah lam tur a ni.Damdawi ba nei te pawhin a hnehah hian rulh nghal tur a ni ang

Damlo hming
Thantluangi
Zonunmawia
Vanlalchhuangi             
HK Hrangbuanga
Zawlrokunga
Thangkhuma
Lalrawnkunga
Lalthazuala
Lalhmingthangi
Zadinga
Lalrammuani
Tlanthanga
Lalnunsiami
Thangzahluna
Proposer Name
Thantluangi
Vanlalhnaiha
Lalvulliana
HK Hrangbuanga
Zawlrokunga
Thangkhuma
Lalrawnkunga
Lillypuii
Lillypuii
Zadinga
Thangliansiama
Rinchhunga
Phailuahliana
Lalliankhupa

Hmar veng Branch Committee thu
Dt.18.3.2012.(Sunday) khan Hmar veng Branch YMA te chu Pu H.K Zapara inah Committee an nei a,Tun tum Serlui Group Conference kal dan tur chungchang sawiin Branch O.B ten a kalna tur Motor an ngaituah dawn a,Dt 21.3.2012(Nilaini) Tukthuan eikhamah Pu B.Dokunga In kawtah in nghahkhawm tur a ni.A haw leh hun atan Dt 23.3.2012(Zirtawpni) zan hun hman zawhah haw vek nise an ti bawk a.Tin,Hmarveng branch atangin VADS member atan Pu K.Thangvela leh Pu Lalchawisangate an ruat bawk a ni.

Kumpuan zirtir dawn
 Vawiin hian Hmarveng Branch YMA te chuan Committee hmasa a an lo rel tawh angin an Branch chhunga zirna in hrang hrangah kumpuan zirtirna neih nise a tih chu Primary School -III leh Middle School-III ah te kumpuan zirtirna an nei dawn a ni.Primary School-III ah hian Pu Laltanpuia Royte in kumpuan hi a sawi hawng dawn a,MS-III lama hun hmang tur a ruat Pu P.C Thankhuma chu a remchan dawn loh avangin a aiah Pu Lalhmangaiha Keivom ruat a ni.

Vairengte atangin qualifying Referee kal
Vawiin atanga North East Games vawi 26-na neih turah Vairengte a tangin Alphonsa Lallawmzuali (Nutei) D/o P.C Parmawia Venglai chu Badminton Qualifying Refree a nih avangin Game hotuten an ko a.Nimin lam khan Aizawl ah a chho a ni.A hnen atanga thu kan dawn danin vawiin lam hian Games an tan nghal dawn a ni.

SDO(C) ten naute nei
Dt.17.3.2012(Inrinni) tlai lam khan Vairengte SDO(C) te nupa chuan fapa duhawm tak mai Kg 3.750gram a rit an nei a, Rengkhawpui Editorial board chuan kan lawmpui tak zet a ni.SDO(C)te chhungkua hi Nilaini hian Vairengte an lo chhuk dawn a a,Ningani hian Serlui Group YMA Conference a hman pui leh dawn bawk a ni.

Day Hmang
Nimin khan YMA Playgroud ah EFCI kohhran Kristian Thalai Pawl te chuan KTP day an hmang a,group 4 ah in thenin Field ah hian intihhlimna chi hrang hrang an nei a,Volleyball bikah hian group 2 ah an inthen a ni.

Field veng Branch
Field veng Branch YMA te chuan Serlui Group YMA Conference ah mi 25 bawr vel an kal thei dawn a,an hruaitute hnen atanga thu kan dawn danin motor hi tripper 207 hman an tum a ni.

ICTC ah Rs 2000 pe
Nimin khan Vairengte Pastor Bial Kristian Thalai Pawl te chuan Vairengte Damdawiin a ICTC (Intigrated Counselling & Testing Centre) hnenah HIV /AIDS veite enkawlna sen so atan Rs 2000/- an pe a,ICTC Councellor Pi Mawitei chuan Bial KTP te chungah lawmthu a sawi a ni.

Lawmthu sawina
Nimin khan Vairengte Pastor Bial Kristian Thalai Pawl te chuan Vairengte Damdawiin a ICTC (Intigrated Counselling & Testing Centre) hnenah HIV /AIDS veite enkawlna sen so atan Rs 2000/- an pe a,ICTC Councellor Pi Mawitei chuan Bial KTP te chungah lawmthu a sawi a ni.
In khawngaihna dawngtu
C.Sapbuanga leh a chhungte
Venghlun,Vairengte

Read More

Editorial.20.3.12

   Editorial :    
Khaw lum tak hnuaiah chuan ka lo muhil a ni chek ang chu,ka mumangah chuan hmun pakhatah hian khawtlang hruaitute hi an lo awm khawm hmur mai a, Kan hawi kual vela khawtlang tana anmahni phak tawk a thawh hlawk tak tak te an ni hlawmin ka hria a.Chutia ka thlir reng lai chuan khawl mak tak mai hi an rawn chawi chhuak a,chu khawl chu khawtlang an hmangaih dan tehna khawl hi a lo ni a.Mitin mai chu a mal te te a endik tur alo ni a.Chutiang a an tih tak chuan tam tak chu huphurh avanga bianga thlan tui luang ta mai te pawh ka hmu a ni.Chutiang a endik a nih dawn lai tak chuan ka thanghar ta mai si a,ka thanghar takah chuan mumang mah nise khatiang khawl kha awm tak tak se ka ti khawp mai.

Read More

Rengkhawpui 19.3,12

North East Games vawi 26-na nei tur atan nimin khan Vairengte-ah Mikhual hmuah a ni

     Vairengte,19th.March.2012 : Dt 20th-23th March atanga tan tur North  East Games vawi 26-na Mizoram a neih tur chu nimin khan Kawngthar Excise Gate behchhan in mikhual lokalte hmuah an ni.

         Mikhual hmuak tur hian Vairengte atangin mi paruk ruat an ni a,anni hian nimin zingkar atang khan mikual lokal apiangte lo lawmin Aizawl lama an thlenna turte an lo hrilh thin a,mikhual lo thleng a piangte chu Aizawl lamah an report nghal zel bawk a ni.Kan hriat theih chinah chuan mikhual hi  Tripura(Agartala) atangin Sumo 14 leh Assam atangin Bus lian 2 a lo thleng tawh a,an vai hian mi 140 bawr vel an ni.
    SDPO hnen atanga thu kan dawn danin vawiin lam hian Assam sawrkar Minister of State chu he games hawnna atana tel tur hian Vairengte a rawn tlan pel dawn a,Vairengte Police lam pawhin atul angin Vairengte Area chhungah venhimna an lo pe dawn a ni.
    Tukin zingkar lam hian Manipur lam atanga lokal turte an lo  thlen hman beisei a ni a,Mikhualte hi naktuk lamthleng khian an hmuak dawn a  ni.

Khawn vartui sem

   Vawiin zing dar 9:00 atangin tlai dar 4:00 thleng hian dearler No.1  Pu T.C Lalnuntluanga Hall vengte chuan Khawnvartui an sem dawn a,anni hian Retailer I,II leh III a buhfai la thinte an pe dawn a ni.VC-II lam Dealear No 2 leh 3 te pawhin vawiin zing atang hian an sem tan dawn a ni.Khawnvartui hi Card pakhatah Litre 4 zel a sem tur a ni a,Rs 62/- man a ni dawn a,a nawi hi ken tel nghal tur a ni.

Keicham ram kang

  Vairengte Police Station atanga thu kan dawnin Dt.17.3.2012(Inrinni) khan Bilkhawthlir,Keicham veng ram chu nasa takin a kang a,Forest Department lamin Vairengte P.S-ah hian FIR an theh lut a ni.Nimin lam khan Vairengte Police-te hian a hmunah kalin an enfiah a,a ti kangtu hi an chhui zui mek a ni.Ramkang zau zawng hi Hectar 10 vel a zau a ni.

Intihsiakna nei 

     Nimin chawhnu lam khan Vairengte Presbyterian Kohhran a,Sunday School naupangte chuan thla thum dan zir tur Department hrang hrangten Hla,chang leh Zirtitrtu attendance hmangin intihsiakna an nei a,hetah hian Intermidiate department chuan point hmu sang berin lawmman pakhatna Rs 500/- an dawng a ni.

Ran khuahkhirhna dan khauh zawkin kalpui

VC-II lam chuan Ran khuahkhirhna dan khauh zawkin an kalpui mek a,Inrinni lam khan Vai bawng pakhat mi huana a tla lut lai chu man a ni a,VC te hian a neitu chu dan a bawhchhiat man an chawi tir a,an ran te enkawl a khuahkhirh turin an zilh bawk a ni.

Joint YMA Committee 

   Dt.17.3.2102(Inrinni) khan Vairengte Joint YMA ten Committee an nei a,hetah hian Serlui Group YMA Conference kal dan tur chungchang sawi ho a ni a,Branch hrang hrang te  he conference ah hian an kal thei vek dawn a ni.He Conference ah hian Branch hruaitute ruala kal lo,engthil emaw vanga Vairengte ti mualphotu an awm chuan Joint YMA in a chungchang thu an ngaihtuah dawn a ni.Conerence a kal tumte chuan a theih hram chuan mahni buhfai in tum turin an ngen bawk a, Joint YMA Zaipawl memberte pawhin a hran a Motor hmang lovin an mahni Branch kalna motor ah kal ve tur a ni.Conference hi Dt.21.3.2012 (Nilaini) khi thlen kim ni tur a ni.

Inthlanna nei dawn

MNF Block committee in a rel angin tun thla Dt.29.3.2012  khian Group hruaitu thlanna an nei dawn a,Thla thar ni 5 ah Unit lamte an in thlang ve leh dawn a ni.

Computer Hriattirna

    EmEs Info Tech Kawngthar veng a Computer zirlaite tan Dt.20th.March 2012 (Tuesday) Zan atangin Class tan leh tawh tur a ni a,Computer zirlaite taima taka Class chhunzawm leh vek turin hriattir kan ni a,Admisssion ti thar duh tan Admission hawn a ni bawk.

    EmEs Info Tech Kawngthar veng a Computer zirlaite tan Dt.20th.March 2012 (Tuesday) Zan atangin Class tan leh tawh tur a ni a,Computer zirlaite taima taka Class chhunzawm leh vek turin hriattir kan ni a,Admisssion ti thar duh tan Admission hawn a ni bawk.

Read More

Dt 17th march.2012(Rengkhawpui)

Joint YMA in a buatsaih Intihsiakna hrang hrangah Chhim veng Branch in lawmman pakhatna an la

       Vairengte,16th.March.2012 : Dt 10.3.2012 (Inrinni) atanga Joint YMA in Serlui Group YMA Conference inbuatsaihna atana intihsiakna a buatsaih chu nizan khan Community Hall-ah lawman sem a ni a,a pumpuiah Chhim veng Branch pakhatna an ni.

        Nimin khan YMA Playground-ah hnam lam hmanga inelna leh Volleyball final te neih a ni. Intihsiakna tan hma hian Chairman Pu H.Lalnunmawia chuan lam endik tute zing a pakhat Pu H Lawmkima  chu sawmin, Point pek dan tur leh endik dan turte sawifiahna  a  nei a,point-te hi pakhatna in point 10,pahnihna in point 7, pathumna in point 5 leh palina in point 3 pek an ni a,Volleyball ah hian semi final a lutte hi pathumna ang chhiar an ni a,Lam intihsiakna ah chuan pathumna hnuai lam zawngte hi palina ang a chhiar vek an ni bawk. Hnam lam intihsiakna ah hian Solakia,Sarlamkai leh Chawnglaizawn hmangte in Branch hrang hrangten in elna an nei a ni.Lam endiktute hi  Pu H Lawmkima, Pu L Hmangaihzuala leh Pu T Lalvuana te an ni.
    Tin, zan lamah Community Hall-ah Lengkhawm zai hmanga intihsiakna neih chhunzawm leh a ni a, he hunah hian Kumpuan hawnna neih nghal a ni bawk.He intihsiakna ah hian a pumpuiah Chhim veng Branch chu pakhatna an ni a, Pahnihna hi Hmarveng Branch an ni a,pathumna chu Field veng Branch  an ni. Lawmman te  hi pakhatna in Rs 3000/- niin,pahnihna in Rs 2000/- a ni.Tin,Pathumna chin leh Branch hrang hrang intihsiakna pali a tel kim vek te hnenah hian Consolation Prize Rs 1000/- theuh an pe bawk a ni.Nizan dar 10:30 vel khan intihsiakna hi zawh fel a ni.

Zu man 

    Dt.15.3.2012 zan khan Vairengte Hmar Branch YMA te chuan Taxi pakhatah Zu an phur a ni tih hria in Taxation Department-ah an report a,Taxation Department lam hian an lo man ta a ni.Heng an zu man hi Um puitling 150 a ni a.A neitu leh a motor erawhchu an man tel lo niin kan thu dawnna chuan a sawi a ni.Heng an zu mante hi nimin zing khan Vairengte Police ten Taxation Department kut atangin an la chhawng leh a ni.Vairengte Police Station a Officer incharge hnen atanga thu kan dawn danin heng zu neitute hi Police lam chuan an chhui zui a,nimin lam thleng kha chuan an la man chhuak lo a ni.

Ram kang

    Nimin tlai khan Harmon veng tlak lampangah huan hal vangin, Harmon veng tana hlauhawm khawpin kangmei a chhuak a. Veng chhung nu leh pa, nula tlangval leh naupang te nen lam kangthelh hian an hah hle a ni. VC ten an hriat veleh a hmunah an kal nghal a, VCP hnen atanga thu kan dawn danin he lai hmunah hian  MGNREGS sum atangin PARK an siam a,chung pawh chu kangin thingphun nungsa pawh an thih deuh vek a rin thu a sawi a ni.

Blood Storage chungchang

      Vairengte CHC Medical Officer Pu C.Lalrinchhana chu nilainni khan Aizawl ah Blood bank chungchangah training neiin a kal a,a hnen atanga thu kan dawn danin he trainingah hian Blood Storage enkawl dan chungchangte zir ho a ni.Vairengte a Blood Storage kan neih hi a nih tur ang a hman a nihlohna chhan chu he storage hian 24 hours power supply a mamawh a,chutiang a nih loh chuan thisente hi a chhe mai thin a ni.Hetiang anga vawng tha reng tur chuan damdawiin a Generator hi a tha tawk lo a ni ati.Nimin lam khan thisen pek  chungchangah Laboratory  Technician ten trainning an nei bawk a ni.Vairengte ah hian thisen hi pek theih a ni lova,a vawn thatna khawl chauh kan la nei a ni.Hei pawh hi kan sawi tak ang khan a mamawh tawk power supply kan pek theihloh avangin a hman tangkaina tur angin kan hmang tangkai thei lo a ni.

Ni 100 inhlawhna hmangin siam dawn

   Village Council-II te chuan tunhnai  a Job card hlawh  Rs 48 an cut hmangin heng a hnuai a mite hi siam an tum a ni.
1.Chhim veng a Pi khupi in bul step siam.
2.Second land an siam mekah side drain siam.
3.Zalen veng atanga Field pan thlakna side drain siam.
4.Pu C.Malsawma te In kawng tih zauh belh.
5.VC-I leh VC-II in rinna Khawhthla mawnga kawngpui a leimin chu Temporary a kal theih turin siam a ni dawn bawk a ni.

Job card Checking nei

    Village Council-II lama VEC te chuan nimin zing dar 9:00 vel khan an area chhunga Job card delete ngai leh Transfer ngaite en felna hun an nei a,siam belh ngaite pawh an enfiah nghal bawk a ni.

Inthlanna nei dawn

Dt.15.3.2012 zana Vairengte Higher Secondary School managing board thu khawm chuan Dt.20.3.2012 zan dar 7:00 ah Community Hall-ah kim zawk a O.B thlanna neih nise an ti a ni.

Lawmthu sawina

Dt 15 march (Ningani) khan ka wallet a chhunga pawisa leh lehkha pawimawh awm ka tih bo chu  Vairengte SDPO Driver Pu Thuam’n lo chharin min pe kir leh a.He chanchinbu kal tlang hian a chungah lawmthu ka sawi tak zet a ni.Hetiang mi rinawm kan khawchhungah an awm hi ka chhuang tak zet a ni.

Magistrate lokal

Nimin khan Kolasib Magistrate Pu H.Lalduhsanga chuan Vairengte a Police Station lo tlawh in,an hnathawh dante a hmunah a lo en fiah a ni.

Vairengte ah Anti Tobacco Committee din

Sawrkar thupek angin Vairengte Sub-Division huam chhung atan Anti Tobacco  Committee hetiang hian din a ni.
Chairman    : Pu .Lalrohlua SDO(C)
Vice Chairman    : Lalrinpuia Varte (SDPO)
Secretary    : Pu C.Lalrinchhana ( Medical             Officer)
Member te:
1.Pu Lalhmachhuana SDO (P&E)
2.Pu J.L Mato (O.C Police)
3.Pu Lalchansanga (O.C Excise)
4.Pi Lalsangzuali Hmar AEO
5.Pi Lianzuali (Head Mistress Govt.H/S)
6.Pu H.Lalliana (Head Master H/S-II)
7.Pu B.Dokunga (VCP,VC-I)
8.Pu R.Lalfamkima (VCP,VC-II)
9.Pu Lalrammawia (Joint YMA President)
10.Pi Thangthuami (Joint MHIP President)
11.Area MUP President
12.H.K Hmingthanga (Prominent citizen)
13.Pu Zoremsiama (Prominent citizen)
14.Pu M.Michaela
(Sub Deputy Commissioner)
    Tin,hetiang hian Anti Tobacco Squad din a ni.
Leader     : Pu Zalawta (Vice President VC-I)
Asst.Leader :Tv.Vanlalchhana Sailo
(President MZP Sub Hqrs)
Member te:
1.Pu Ramdinsanga (Second O.C Excise)
2.Pu Chuauzika (R.O Forest Dept.)
3.Pu Zaichunga (A.S.I Police)
4.YMA aiawh 4 Joint YMA in a ruat ang.
5.VESA aiawh mi 4 VESA hruaituten an ruat ang.
6.VC-I leh VC-II ten an aiawhin 2 ve ve an ruat ang.
7.Kohhran(Presbyterian,Baptist etc.) hrang hrangten an aiawh 1 theuh an ruat ang.
8.Editor,Local Newspaper.
    Heng a chunga memberte ruat fel an nih hnu ah sawrkar pawmpui turin SDO(C) in a theh lut ang.Tin,tun thla chhungin District Level Anti Tobacco hotuten Vairengte rawn tlawh an tum bawk a ni.Office leh zirna in te,Vantlang punkhawmna te endikin hmalak a ni dawn a ni.

Letter to Editor
   Pu Editor,
   
    Vairengte a kan SDO (P&E) in a Current hman dan dik tawk leh tawk loh endik thuai a tum thu Rengkhawpui Chanchinbu-ah kan lo hmu a. Hei hi ti ngei se Consumer-te chuan kan duh a ni. P&E Department a thawk an nih avanga Hitter Double an hmanga mipui ah Current hman tlem tur kan inzirtir a, mipui in Current bill kan chawi tawk tawk a, Hitter hmang ten tlem te an chawi lawi si a, hei hi chu hriatthiam a har deuh a ni.

khawtlang tana i thawhpui
Venghlun pa

Read More

Editorial.17.3.12

Editorial :

            Vawikhat chu Artist ropui leh hmingthang Leonardo Da vinci khan milim pakhat hi a ker a,thei tawp a uluk a a ker zawh hnu chuan a thian kawmngaih em em hnenah chuan enge a an? tiin a milim kher chu a hmuh tir a,a ni chuan a hnar ngul hi tlem chuan a sang deuh a ni tiin a lo hrilh a,a ni chuan vut tlem leh lungkherna hmanrua chu kengin milim chu chhu derin a vut ken chu a thlau zeuh zeuh bawk a.A thianpa hnenah chuan a nalh tawk tawh em? tiin a zawt nawn leh a,ani chuan a that tawk thu a lo sawi a.A nihna takah chuan Leonardo khan engmah a khawih danglam lo a,a rilru zawk kha a tih danglam sak a ni.Hetiang chiah hian sawiselna thenkhat hi chu a ni thin.

Read More

Dt 16.March.2012

VC-II,VCP Pu R.Lalfamkima’n P.H.E Minister S.Hiato-a VC-II aiawhin a hmu. 

          Vairengte,16th.March.2012 : Dt. 15th.Mar.2012 (Ningani) khan VC-II ,VCP Pu R.Lalfamkima chuan  Hermon veng leh IOC ten P.H.E-ten tui connection an pek ve theih nan P.H.E Minister Pu H.Hiato hnenah a thlen a ni.

        VC-II teamte hi tunkar tir thawhtanni atang khan khawtlang tana thil pawimawh leh Harsatna kan tawh thin chungchangah Minister-te dawr turin Aizawl an kal a,RMSA hnuaia School sakna hmun tur ram ruak leh Veng thenkhatin Power supply an hmuh ve theih nan te Chief Minister an hmu a ni.Nlaini khan Team member thenkhatte an lo haw hnuin nimin chhun dar 12:00 vel khan VCP Pu R.Lalfamkima chuan P.H.E Minister S.Hiato hmuin Hermon veng leh IOC chhuah lampang vengah te P.H.E Department-ten tui an pek ve theih nan VC-II aiawhin a hmu a,Minister hian Engineer in Chief leh S.E(RWC) te hnen aken tur lehkha lo ziahsak a,he lehkha hi kengin thil tul leh  pawimawh thenkhat te tih fel nghal a ni.VCP hnen atanga thu kan dawn danin Assambly Season lai a nih avangin a hmun hmate verify turin thla thar lamah an lo kal thei dawn chauh a ni a ti.

 NGO Co-ordination Committee ten hma la 

        NGO co-ordination Committee General Secretary Pu Lalrintluanga Renthlei hnen atanga thu kan dawn danin PWD in Vairengte to Bilkhawthlir kawngpui siam chungchangah hmalak mek a ni a,he kawngpui siamtu tur hi Tenderte pawh chhan fel vek a ni tawh a,hemi chungchangah hian a rang thei ang ber a hma la turin Chief Minister leh Bialtu MLA hnenah pawh lehkha theh luh a ni tawh a ni a ti.Tin,Vairengte Damdawiin a Pharmacy kan neih loh chungchangah pawh sawrkar hnenah hian lo thlen tawhin an lak tharte dah turin engkim tih fel a ni tawh a,sawkarin a lak tharte hi court lamah thubuai a awm leh avangin Vairengte hian Pharmacy kan la neilo a ni a ti.

Joint YMA buatsaihin intihsiakna nei dawn

         Vawiin zing dar 11:00 a.m atanga tanin YMA Playground-ah Joint YMA buatsaih in Branch hrang hrangten Hnam lam(Cultural Dance) hmangin inelna an nei dawn a,Chawhnu lamah hian Volleyball mipa leh hmeichhe finalin a zui nghal dawn a ni.Mipa Volleyball final-ah hian Chhim veng Branch leh Bangla veng Branch ten an inkhel anga, Hmeichhe  Final-ah hian Venglai branch leh Zalen veng Branch ten an khel leh bawk dawn a ni.Field lam programme ah hian Chair leh dawhkante lo buaipui turin Field veng Branch YMA te ruat an ni. Tin zan lamah hian dar 7:00 ah Community hall-ah Lengkhawm zai hmang a intihsiakna neih leh tur a ni dawn a,Lengkhawm zai hi solfa zul zui mizo lengkhawm zai dik taka sak tur a ni.
    Nizan lam khan he intihsiakna atana inbuatsaihin zan rei tak thlengin  Branch hrang hrangten an zir a ni.

Vairengte Police ten Crime Review meeting nei

         Vairengte SDPO hnen atanga thu kan dawn danin nimin chawhma dar 11:00 khan Vairengte SDPO Office -ah  SDPO hoin Crime review metting an nei a,SDPO Vairengte huam chhunga thubuai la chinfel loh(case pending)te chipchiar taka sawiho a nih bakah Police hmalak zel dan turte sawi ho a ni.Kum 2012 chhung hian Vairengte Police Station-ah thubuai 15 ziah luh a ni tawh a,chung zinga atam ber chu rukruk leh zu case te an ni.He meeting-ah hian Police Officer-a ASI leh a chunglam mi 11 an tel a ni.

Rural Bank-ah loan rul thalo

     Vairengte Rural Bank Manager Pu Lalfakzuala Colney hnen atanga thu kan dawn danin sawrkar kum atawp dawn a,mi thenkhat Bank a loan puktuten an rul thalo hle a,a rulh hun tawp tawh a rul lo leh a rul dan tur anga rullo te hnen ah tunlai hian lehkha pek an ni a,heng mite hian tun thla chhung ngei a rul theuh turin an ngen nawn leh a ni.

In rem tum

    Nimin tlai khan tunhnai a Bikhawthlir a Scooter leh Truck in sut chungchangah Motor neitute leh Bilkhawthlir lam VCP te leh NGO hruaituten inremna neih tumin Vairengte Police Station ah an rawn kal a,he thu kan buatsaih lai hian chanchin kimchang kan hre thei rih lo a ni.

Vengchhung thian fai

     Vairengte Primary School -II a Eco Club-te chuan zirtirtute hoin  nimin khan an sikul leh a chhehvel te, ICI biakin panna kawng bul vel a Polythene leh  bawhhlawh awm te an thian fai a,Zunin a bawhlhawh leh hnawk awmte pawh an ti fai nghal a ni.

Awmni khamin zir

     Nimin khan kan hriat theih chinah Venglai Branch leh Hmar veng Branch te chuan Awmnikham in Hnam Lam leh Lengkhawmzai hmanga  intihsiakna tur an zir a,memberten nuam an tiin an hlawkpui hle niin thu kan dawng a ni.

Read More

Editorial. 16.3.2012

Editorial :

               Branch hrang hrang ten Central YMA a kum puan ‘ram leh hnam humhalh’ tih chu hawnna kan nei nual tawh a.He kumpuan hi mizote tan chuan a mawiin a duhawm khop mai, amaherawhchu eng tiang kawngin nge humhalh kan tum,tih zawhna hi a awm hmasa ber lo theilo.Kan ram hi kan vannei nge ILP hmangin hnam dangten min chim ral lohna turin humhalh sa kan ni a,kan in hung vena kulh ngei pawh hi keimahni hian kan thiat duh fo niin a lang a ni.Tun hnaiah ILP sum dawn nan a hmang duh tawk te pawh kan awm tawh niin a hriat a,kan hnam venhimna kulh chhete kan nei ve chhun tal hi chu zawrh sumah hmang lo hram  ang u.

Read More

Dt 15.March.2012

Vairengte Police khawchhunga zan lam a Patrolling ten Zu tha hnem tak an man

       Vairengte,15th.March.2012 : Dt. 13.Mar.2012 (Thawhlehni) zan 8:30 vel khan Vairengte Police Khawchunga Patrolling te chuan IOC vengah  Taxi  MZ 05-5793 atangin Sap zu umpuitling 390 an man.
          Vairengte Police Station atanga thu kan dawn danin Thawhlehni zan khan patrolling in an chhuak a IOC venga Kolasib Taxi pakhat lo ding chu ringhlelin an han check chiang a,Taxi hnunglamah  Buara bag-ah zu tha hnem tak an hmuchhuak ta a ni.He zu neitu hi Lalhmangaihi kum 47 D/o Manthanga (L),Thingdawl vengthar a ni a,amah bakah hian Taxi driver Lalchhuangkima kum 23 S/o Kallaithanga Thingdawl vengthar tho chu man tel bawk a ni. Heng Zu an man te hi Case 32 an ni a,Local Market Value ah chuan Rs 117000/- man hu vel a ni.Zu neitu Lalhmangaihi sawi dan chuan zu la tur hian Zirtawpni atanga vairengteah an lo kal tawh thu leh an motor that loh avangin kawng lakah harsatna an tawk nual a ni.Heng Zu te hi Bhaga wineshop atanga lak niin Aizawl a hralh leh an tum a,Awithang peng atangin Phainuam lamah kal kual puiin State veng pengah an chhuah pui niin a sawi. Zu man atan hian avaiin Rs 58000/- bawr vel a hmangral a ni. Thawhlehni zan khan IOC ah an motor hi chhia in Police Patrolling nen an in nangching ta a ni.
    Lalhmangaihi hian a vawikhat tihna a ni lo a,nikum lam pawh khan Vairengte Excise hoin an lo man tawh a ni.Vairengte PS No.15/12 14.March 2012 Under section 8(1)/24 MLTP Act. hmangin Vairengte Police station ah case hi ziah luh a ni a,nimin lam khan Kolasib Court-ah an thawn nghal a ni.Vairengte Police te hian zan tin patrolling neiin an chhuak thin a,Misual man chungchangah an thawk tha thei hle a ni.

VC-II Team ten Chief Minister hmu
         Nimin zing dar 10:30 khan Vairengte VC-II team te chuan Mizoram Chief Minister Pu Lalthanhawla chu a office kalin an hmu a. RMSA High School sakna hmun tur atana Electric department ramruak, Tourist Lodge thlanga, hmun zawl zauh deuh awm chu an dil a ni. Pu Hawla hian an thu thlen hi a ngai pawimawhin, E In C, P&E Department hnenah lehkha a siamsak nghal a ni. Kolasib EE te nen a hmun en ho dan tur an la sawi ho leh dawn a ni. Tin, IOC veng chhuahlam pang leh Harmon venga Electric Current luh tir turin  an dil bawk a ni.VC-II Team-te hi Bialtu MLA Pu K.Lalrinthanga'n kawng engkimah a buaipui avangin a chungah an lawm hle a, VC-II Team te hi Pu R. Lalfamkima VCP, Pu R. Lawmthanga VCM, Pu Lalrintluanga Renthlei VCM te an ni a. Pu Lawma leh Pu Mama hi nimin  lam khan Vairengte lamah an rawn chhuk a. Vawiin hian Pu S. Hiato Minister PHE changtu hmuh VCP hian a  tum  dawn a ni

P&E Department ten checking nei dawn
     Vairengte SDO(P&E) Pu  Er. Lalhmachhuana hnen atanga thu kan dawn danin Current kan hman dan chungchangah kan hman dante a dik tawk leh tawk loh en dikna neih thuai an tum a ,Staff lam an in daih loh deuh avangin a tilo mai an nih thu a sawi bawk a ni.Veng dang leh Khawpuiah te ngei pawh Power an neih that loh laiin Vairengte in kan neih that bikna chhan chu  ‘a thawktute in pekna avang leh CIJW School hi hmun pawimawh tak a nih vang a ni’ a ti. Bill pek chungchangah Vairengte mipuite hian an pe tha ber a,chutih laiin kan khaw chheh vel lam hian an pek that tawk loh avangin a chang chuan an chawi belh thin thu a sawi bawk a ni.


MGNREGS hlawh la
     Nimin khan VC-I leh II tan MGNREGS hlawh sem a ni a.Tun tumah hian ni 12 hlawh chauh a lo thlen avangin Ni 12 hlawh hi sem a ni.VC-I lamah chuan Pawisa nawi a buaithlak avangin Rs 1500/- a semin  a nawi la awm chu  ni 2 hlawh an sem leh hunah an sem tel dawn a ni.

VHSS MANANGING BOARD O.B MEETING NEI DAWN
Zanin  Dar 7:00 PM hian Vairengte Community Hall-ah Vairengte Higher School Secondary managing board-te chuan meeting an nei dawn a,Board memberte chu kim taka kal turin an in hriattir a ni.

Tanpuina pe
    Nimin tlai khan Presbyterian kohhran Vairengte Branch KTP te chuan an member pui Lal chhuanawma,S/o Lalduhawmi Venglai chu rei tak natna khuma a awm tawh avangin Rs 500/- in an tanpui a ni.

Winter Olympic nei dawn
   VG&SA hruaitute hnen atang a thu kan dawn danin hun remchang hmasa berah Winter Olympic neih an tum a,he Olympic ah hian VG&SA hnuai a in affiliate, sport Disipline hrang hrangte tan an siam dawn a ni.

Inbuatsaih nasa
Joint YMA in Group conference atana intihsiakna a buatsaih chu naktuk mai anih tawh avangin tunlai hian Branch hrang hrangte chu lam zirin zantin hun an hmang a ni.

Hriattirna leh Ngenna
State venga ICI Kohhran miten Biak In sakna tur atana Lucky Ticket an siam a vawr hun atana lo ruat tawh Dt 15.3.2012 (Ningani) chu rem chan lohna avangin a hun sawn a ni a, thla thar ni 12 ah vawr zawk tur a ni. Tlawmngai lo leisak tu te zawng zawng chungah in ngaihdamna leh hriatthiamna an ngen a ni.

Chanchinbu man
March Thla chanve kan lo chuangkai leh ta a.Thla hmasa February Chanchinbu man la pe loten a rang lamin a khawntute hnen ah lo pe theuh turin kan ngen nawn leh che u a ni.



 

Read More

Editorial.15.3.12

Editorial :
            Vairengte hi kan van nei nge kan khawchhung Sawrkar Officer lian kan neih hote hi biak nuam leh fel tak tak vek an  ni.Amaherawhchu an fel leh an that avang ringawt hian an zahawmna hi kan hriat reng a tul a ni.Kan in hriat that avang leh kan innel avang ngawt a pawlawh leh zah lo tak a biak hi i chinglo hram ang u.Mi kan biak leh kan dawr dan atang hian kan nihna chiang takin a lang chhuak thin.Tin,mi a nihna avang a biak that leh thatloh kan neih thin chuan kan in let a tul ngei ang.Mihausa leh thiltitheite tlawn huam thin nge kan nih a,mi reitheih a nih vang emaw,mi satliah a nih vang ngawt emaw te a kan be tha duh lo a ni zawngin Patihan in a min siam dan ‘in mamawh tawnna khawvel’ ah hian chep tak leh hreawm takin kan nun kan hmang ngei ang.

Read More

Dt.14th.March.2012(Rengkhawpui)

State veng an Pu Zathanga Ran in kangah Kel  pahnih an Kanghlum

         Vairengte,14th.March.2012 : Dt. 12.Mar.2012 (Thawhtanni) zan dar 8:30 vel khan State veng a Pu Zathanga  kel  in chu a kang a,Kelpui 1leh a pachal 1 a kang hlum a ni.

           He kangmei chhuakah hian Kel pui lah Kel chal te chu an kang hlum a,a naute pahnihte pawh an kan nasat avangin nimin lam khan an damchhuak dawn lova an hriat avangin an tihlum ve leh a ni.He kangmei hi a chhuah chhan tak hriat a ni lova.A neitute hian Thosi ur nan a hnuaiah Buara chhiate an hal thin a,amaherawhchu hemi zan hi chuan an hal loh thu an sawi a,a hma zan erawh chuan an hal ngei thu pawh an sawi a ni.Mit a hmute sawi dan chuan kangmei hi a hnuailam atanga lo chhuak niin an hria a ni.
    He kangmei chhuahna bul lawkah hian Transformer a awm a,a bul hnaih tak ah in a awm loh avangin in dang kangkai lovin an thelh mit thei hram a ni.Pu Zathanga hian Kel pui 2 leh  kelchal 2 a nei a,heng bakah hian a note engemawzah an nei bawk a ni.An zing a 2 phei chu midangin an leisak a,he kel in kangah hian an la lawi rih a ni.He kangmei chhuak hi State veng mipuiten theih tawp a an thelh hnuin an ti mit thei  hram a,kan hriat theih chinah kangmei chhuah chhan hi hriat a la ni lo a ni.

PWD In hmalak tum

   Nimin lam khan SDO (PWD) chu kawngpui siam that a nih dan tur chungchangah Rengkhawpui editor-in biak tuma a kal chu alo awm lova, Phone hmang a biak pawh a ni a,a hnen atanga thu kan dawn danin tunhnai a kawngpui siamna tura contractor -ten tender an chhang tawh ang a sawi chu Official a a la hriat loh thu leh kan kawngpui chhiate hi siam that vat a duh thu te, khawtlang hruaitute pawhin sawrkar lam hotu nawr ve tur a a duh thu a sawi a ni.Tunhnaia an hnathawh tur hmachhawpte sawiin Hmarveng Biak In panna atanga High School tuikhuah panna kawng Metre 180 vel Metal an tum tur thute leh Office thenkhat repair an tum thu te pawh a sawi a ni.Tunlai hi Financial Year tawp hun a nih avangin hotu lamten Division(Kolasib) lamah awm turin an ti a,Vairengte ah hian engtikah nge a lo chhuk leh ang tih chiang takin a sawi thei rih lo a ni.Kan hriat theuh tawh angin kan SDO(PWD) hian Kawnpui thlengin a bial a ni.

VC-I lamah MGNREGS inhlawh dawn 

      Vawiin hian Village Council-I lamten MGNREGS ni 7 chhung atana inhlawhna an nei leh dawn a,zing dar 9:00 ah Pu K.T Siama(L) In kawtah in nghahkhawm tur a ni ang.VCP hnen atanga thu kan dawn danin an hnathawhna tur hi Dinthar veng panna kawng tuihawk luan kawr siam tur leh a kawngte siam rual a ni dawn a.Tin,Tlang veng Tanky siamna a leivung an chhek khawl chu paih fai tur a ni bawk.He inhlawhna ah hian Bawngtuthlawh emaw Suahdur emaw thirtiang emaw tal ken theuh tur a ni a,heng ang hmanrua keng lo te chu haw tir leh an ni dawn a ni.

MAHCO in phochhuak dawn

    Vawiin zing dar 9:30 atanga tanin Pu Robert Sanhmingliana  dawr(Chhim veng Biak In panna Opposite) kawt-ah MAHCO(Mizoram Apex Handloom & Handicraft co-society limited) buatsaihin Handloom hmang a dehchhuah thil chi hrang hrang lei theihin an phochhuak dawn a.Heng Handloom-te hi a duh apiang tan lei theih a ni dawn a ni.Vawiin atanga tanin Zirtawpni thleng zing dar 9:00 atanga tlai dar 5:00 thleng an hawng thin dawn a ni.

Lawmthu sawi

    Pu Zalawta (VCM) leh Pu H.Lalrinawma(VCM) kawngthar vengten Venglai Branch YMA te hnenah Jersey,Football leh Volleyball khelhna a hak tur set khat ve ve an pe a.Venglai Branch YMA hruaitute chu an chungah an lawm tak zet a ni.Tin,venglai Branch hruaitute hian an member Conference a kal tumte chu Items pakhat tal a tel ngei turin an ngen a,tunah hian zirna hun a la tlai loh thu  an sawi a ni.

 Chhimveng chak

     Nimin tlai khan Joint YMA in intihsiakna a buatsaih kal mekah Volleyball mipa ah Chhimveng Branch leh Zalen veng Branch ten semi final an khel a,Set3 a zawn a  lain Chhimveng Branch hi an chak a ni.

BDO dawr theih hun

  Bikhawthlir BDO thar dawr duhte tan Thawhlehni leh Ningani hian Bilkhawthlir-ah a thu thin dawn a ni.Nimin lam khan Economics Census chungchangah Meeting an neih avangin a thu hman lova vawiin lam hian Bilhawthlirah a awm dawn a ni.

MGNREGS hlawh chungchang

Bilkhawthlir BDO Pu Lalchung nunga hnen a tanga thu kan dawn danin nimin khan January leh February thla ni 100 inhlawhna hlawh chu tih tur ngai leh pawisa te pawh lak chhuah fel a ni tawh thu leh hlawh kan lak thuai tur thu a sawi a ni.

Read More

Dt 13.March.2012

St.Henry School Sport -ah Blue Group ten Point 202 hmuin Pakhatna an ni.

        Vairengte,13th.March.2012 : Dt 10.3.2012 atanga St Henry School ten Sport an neih chu nimin khan Pu Biaksanga MVI Inspector chu khual lian niin nimin khan School Sport chu zawh fel a ni 

              Sport hi zing dar 9:00 ah tanin Khuallian hian thusawina hun tawite a nei a,School Naupangte tan Fooball a pe a,hun remchang hmasa  ber ah School Staff zawng zawng te tan Zanriah a siam sak dawn bawk a ni.Intihsiakna hmasa ber atan Group hrang hrang te Parade  neih a ni a, Individual Items hrang hrang in an chhunzawm a ni.He sport hi nimin tlai dar 4:00 vel khan zawh fel a ni a,Infiamna hrang hrangah Blue Group-in point 202 hmun hmuin pakhatna an ni a,Yellow Group ten point 196 hmuin an dawt a,Pathumna hi Red Group niin point 188 an hmu a,Green Group ten Point 185 hmuin  palina an ni.
    He infiamna ah hian Individual Items a ti tha te hnenah lawmman an pe vek an ni.School naupangte hi infiamna an neihna ah an chauh deuh avangin vawiin hi School an chawl dawn a ni.
    St.Hennry School-ah hian Zirlai 620 an awm a,KG-I  atanga Class X thlengin zirna an hawng tawh a ni.

VC-I lamah VEC Meeting

       Nimin chawhma dar 10:30 vel khan Village Council-I lama Village Employment Committee te VC House-ah an thu khawm a,Hetah hian MGNREGS a hnathawh lehna tur chungchang an sawi ho a ni.Ni 7 thawh tu la awm hi Dinthar veng panna kawng JCB in a nawrna hi tui luankawrte siam tha a,Kawng rual rem lo laite siam that a thawh nise an ti a ni.Kan thu dawnna in a sawi dan chuan Material component hi  alo thleng hnai tawh a,Dinthar kawng RCC a siam an lo tih tawh angin chumi buatsaih nan chuan he in hlawhna hi neih tur a ni.A hun chungchangah vawiin lamah thawh tur a an ruahman chu mithi an awm avangin sawiho leh nise an ti bawk.

Bangla veng chak

    Nimin tlai khan Joint YMA in intihsiakna a buatsaih kal mekah Volleyball mipa ah Hall veng Branch leh Bangla veng Branch ten semi final an khel a,Set 2 ve ve lain atawpah Banglaveng hian 15-4 in Hall veng Branch hi an hneh ta a ni.Vawiin hian Mipa Voleyball-ah Chhim veng Branch leh Zalen veng Branch ten Semifinal an khel leh dawn a ni.Official Refree turin Bena (Bangla veng) leh Josua Lalchulova (Hall veng)te ruat an ni.

VHSS Admission   OPENS 

      Vairengte Higher Secondary School-a lut turte tan Dt13.Mar.2012 atangin Class -XI & XII Admission hawn a ni leh ta.
      Admission Form Rs 10/-a  lain Pu C.Lalnunpuia In Venglai-ah Admission tih a ni e.  Cl-XI Admission ti  turte chuan HSLC Marksheet /Certificate Xerox copy thil tel tur a ni. Cl-XII  atana Admission ti turte pawhin Admission Form hi lak vek tur a ni. VHSS atanga Cl-XI passed tan Document thil tel a ngai lovang.
    Admission Fee    Class -XI        : Rs 600/-
                               Class -XII           : Rs 600/-
    Monthly Fee        Class -XI        : Rs 300./-
                                 Class -XII        : Rs 300/-

Hrechiang duh chuan  Admission tihna hmunah  zawhfiah theih reng a ni e.

VHSS MANANGING BOARD O.B MEETING NEI
Dt. 12.Mar.2012 Zing khan Pu C.Lalnunpuia In Venglaiah Managing Board O.B leh Adviser te Meeting neiin Board Committee  neih hun turte ruatin  Admission Fee leh Monthly Fee zat turte  an rel. Tin, Board Committee-a thlen tur enge mawzat an rel tel thu kan dawng.
    Managing Committee hi Dt.15.Mar.2012 Zan Dar 7:00 PM hian Vairengte Community Hall-ah koh a ni

Saiphaiah zu man

         Vairengte SDPO hnen atang a thu kan dawn danin tunhnai (Pathianni) khan Saiphai Police Check gate  a duty ASI Zaichhunga hoin  Sap zu Mc Dowell um puitling (Plastic) Case 7 lai an man a ni.Heng zu te hi NEEPCO  a hnathawk thin Patel Motor atanga man a ni a,a neitute erawhchu an man tel lo a ni.

SDO(C) lo haw dawn

      Vawiin hian SDO(C) Pu K. Lalrohlua chu naute an neih dawn avang leh thil pawimawhte ti a Aizawl a akal chu  Vairengte ah lo chhuk dawn a,Naute hi karthar lam hian an neih hman an in beisei a ni.

Awmlai

  Pi Hualchhingpuii,kum 83, Venghlun chu nimin tlai dar 1:15 khan ‘Awmlai’ in a boral a,a ruang hi nizan khan YMA nula leh tlangvalten an tlai varpui a ni.Vawiin chhun dar 12:00 ah Pro Pastor Jimmy Malsawmdawnglian’n a vui dawn a,a ruang hi thlanmual No.1 ah phum tur a ni.

Evangelism Cell-in
hma la

Nizan khan  Presbyterian Kohhran Vairengte Branch KTP Evangelism Cell ten member hla zawk leh ruihhlo ngaite inah leng in tawngtaina hunte an hmang a,member pawh an kal chhuak tha hle niin thu kan dawng a ni.

Read More

Editorial. 13.3.2012

Editorial :
             Tun hnaiah Serchhip khua a Serchip Town Vehicle Owner Association (STVOA)ten ‘No Vehicle day’ an hman avangin kawngpui chhe laite siam that nghal a ni a,sawrkar pawh hian nawrh emaw kher hi phut lo hian an tih theih chuan tih nghal mai thin hi a tha a ni.Kan khaw chhung kawngpuite hi a chhe tawh em em a,tunhnaia hriat danin helam kawng siamna tur hi peih fel vek tawh niin tender-te pawh chhan a ni tawh a.Mahse tun thleng hian an hnathawh engmah hmuh tur a la awm si lo.Political party hrang hrang leh NGO pawl hrang hrangte hian tan i la tlang teh ang u.Kan ngaihtuah vat lo zawngin kawngpui chhia kan helna lamah  hian tawhsual kan la tawk ngei ang le.Tin,Motor kawngpui a infiam ching kan awm leh tan niin alang.Kan kawngpuite hi National Highway a ni a,Lirthei tam tak a kal thin avangin kawngpuiah chuan infiam loh hram nise.Tin,khawchhung a lirthei khalhtute pawhin khawchhung bikah tal hi chuan chak tak tak a khalh loh hram i tum tlang teh ang u.

Read More

Dt.12.March.2012

Serlui Group YMA Conference atana Joint YMA in Intihsiakna a buatsaih chu tan a ni.

          Vairengte,12th.March.2012 : Dt 10.3.2012 (Inrinni) khan Vairengte Joint YMA bul tumin  Serlui Group Conference lo awm tur atana inbuatsaihna atan YMA playground-ah leh Middle Schhool -II ah Volleyball khel a ni.

         He Intihsiakna hi Joint YMA in ngun taka a ngaihtuah hnu ah Branch hrang hrangten kan hma lawk Dt 21st March a Serlui Group Conference  lo awm tur atana tha taka kan tih theihna tur leh Branch hrang hrangte kan in pawh tlan theihna tur atan siam tha an ti a,lawmman pawh pakhatnain Rs 3000/- Pahnihna in Rs 2000/- leh Consulation Prize Rs 1000/- te a ni dawn a ni.Consulation Prize hi intihsiakna pali a tel kim vekte hnenah chauh pek tur a ni.
    Inrinni lam khan Volleyball hi mipa in YMA Playground ah an khel a, hmeichhe lamin Middle School-II ah an khel bawk a  ni.Inrinni khan Hmeichhe lam chuan Semi final an khel a,Final-ah hian Venglai Branch leh Zalen veng Branch te an lut a,Dt 16.3.2012 ah Final an khel dawn a ni
    Mipa lamin vawiin tlai dar 3:00 ah YMA Playground ah semi final ankhel leh dawn a,1st match ah hian Hall veng Branch leh Bangla veng Branch ten an khel anga, hun a awm chuan Chhimveng Branch leh Zalen veng Branch ten an khel leh dawn a ni.Khelh hmasa ah hian Official Refree turin Lalengvara (Field veng) leh Lalchullova( Chhim veng)te an ni anga,hun hnuhnung zawkah hian Ben-a(Bangla veng) leh Josua Lalrinchhana (Hall veng) te an ni ang.
    He intihsiakna hi Dt 16. 3.2012(Zirtawpni) hian Final neih a ni dawn a,Chhun lamah Hnam lam leh zan lamah Khawhar hla hmangte a intihsiakna te neih a ni leh dawn a ni.

Lailapur YMA in ti ten damdawi lak sak

   Nimin khan Kolasib lam atanga rawn chhuk thla Lanunpuia,Melody-i leh Jacob-a,Kolasib Vengtharte chu Lailapur-ah Damdawi la in an kal a.An ruih avangin Laialpur-a YMA inti ten rawn um chho in Auto stand-ah Vaiho hian umpha in an damdawi lei toh chu an chhuh sak a.Vairengte Police lamah zualko in  Vairengte Police station-ah Lailapur YMA ho hian an damdawi chhuhsak chu box 2 an rawn pe a,Lailapur YMA inti ho hian damdawi zuartu chu man an duh thu sawiin Vairengte Second O.C hoin Damdawi latute nen an zuk zawng leh a,mahse an leina pa chu hmuh tur a lo awm tawh lo a ni.Damdawi la ho sawi dan chuan an damdawi lak hi box 4 a nih thu leh Box 2 chu an neih sak thu an sawi a ni.Tin,an leina pa pawh Lailapura YMA President a in tih thu an sawi bawk a ni.Vairengte Police hian thil sual titute mah nih se mizopuite tiin theih tawpin hmalak pui mahse ruihhlo zuartu hi an hmu zo ta lo a ni.Mithenkhat rin dan chuan Damdawi zuar leh YMA inti ho hi an in thu rual niin an sawi a ni.Kolasib mite hi Bond sign tirin nimin khan an haw chhoh tir nghal a ni

Venglai Branch Committee

    Dt 10.3.2012(Inrinni) zan dar 8:30 khan Pu C.Malsawma In Kawngthar vengah Venglai Branch ten Comm ittee neiin,Serlui Group YMA intihsiakna tura in buatsaihna atan tunkar chhung hian Awmnikham a  hla zir nise an ti a.A hun leh hmun tur chu memberte in rawn tlangin Branch O.B ten an lo ngaihtuah dawn a ni.Tin, Group Conference kal dan tur chungchang sawi hoin Chanvo neitu leh Palaite tan kalna tur ngaihtuah sak nise an ti a,thlen kim ni ah thlen tuma kal ngei nise an ti bawk .Tin,kalna tur Motor hi Branch O.B ten an lo ngaihtuah dawn a,Special Items nei thei turte Branch O.B ten an ngaituah bawk dawn a ni.ILP siam chungchang ah ILP siam thin ten mimalin an chhawr theih aia tam an siam thin chungchangah fimkhur zawk a SDO(C) ten an pek theih nan hmalak nise an ti bawk.Tunkar atang chuan zantin  hla leh lam zir nan hun hman an tum bawk a ni.

Bike leh Sipai motor in su

   Nimin tlai khan Sipai Camp Area chhung Canteen kual laiah Pulsar Bike AS 11F-1945 chuan Sipai Motor TRDO291618 chu kawngah kual zo lovin a su a.Bike khaltu hi Sushanta Pal,Dholai niin a hnunga a phur hi Lalhmingliana,Field veng a ni.Bike hi a chhe hneh hle a,chutihlaiin bike a chuangte erawhchu ngaihtuah awm lutuk an ni lo a ni.Sipai motor hi ding lovin a tlan zui nghal a ni.He motor hi CIJW School Motor pangngai a ni lo a ni. He chesualna hi alan dan chuan Bike khaltute hian an thiam lo niin Police lam chuan an sawi a,Bike hi a sutu zawk a nih avangin Case pawh file a ni lo a ni.

Motor accident

     Dt.10.3.2912(Inrinni) zinglam dar 1:30 bawr vel khan Vakultui thlen hma deuhah Truck (Ke sawm nei) Cement phur a Accident a,Driver hi a hliam nasat deuh avangin Silchar lam panpui nghal a ni.Vairengte Police O.C hnen atanga thu kan dawn danin Driver hi a mu thlu a,kawng sirah hian a tlan liam ta a ni.Driver hian Handlemen a nei lo  niin thu kan dawng  bawk a ni.

VC -I ten hna chhunzawm  thei rih lo

       Village Council -I lam tana Tui dah khawlna (Tanky) siam mek chu Tunlai hian a siamtu Mistiri chhawr tur an awm rih loh avangin chawlhsan rih a nih tuh VCP hnen atangin thu kan dawng a ni.

VC-II Mipuite hriattirna

     Village Council dan dinglai angin VC-II huamchhung ah Ran chhuah khap tlat a ni a,Dan zawm lote chu Dan ang a an chungah hremna lek kawh a ni ang.

Read More

Editorial.10.3.12

Editorial :
            Mizo Society hi chhuan lo awm leh turah chuan eng ang chiah nge kan nih ang tih hriat a chak awm thin.Thangthar aia upa zahna chang hre reng reng lote kan awm ta nual mai.Nu leh Pa tamtakte hi Fanau enkawl kawngah hian kan hlawhchham em? tih hi  kan in thlir let fo a tha a ni.An mamawh leh duh zawng kan pek ringawt hi nu leh pa mawhphurhna emaw ti kan awm fo thin.Nun dan mawi leh zahawmte kan inchhungah kan in zirtir a tha. Ram leh khawtlang siam that kan tum a,Fanau te pawh ngaihsak hmanlo in kan chhuak nitin a, kan siam that tum ber khawtlang lah chu a zulzapui vaihlenhlo ang mai a ni si..Kan fanauten Inchhung lamah leh pawn lamah nundan sual an lo zir ve mek bawk nen.A nih dan takah chuan Chhungkaw thain khawtlang tha a siam a,Khawtlang tha in Ram tha a siam zawk niin a hriat a ni.

Read More

Editorial.9.3.02

Editorial :
               Tunlai hian khawlai leh huan lo ramah ran khuah khir loh hmuh tur a tam hle a,hemi chungchangah hian kan VC tharte hian  hei aia chak zawk a tan lak a tul awm e.Ran tam tak chu mi huanah te lutin sum chang thei thlaite an ei chhiat sak fo thin a. Kuthnathawktute tan kumpui linglet a an lo thawhhah vena chu a thlawn fo thin. Tin,kawngpui dungah Bawng ek leh ran ek rah pherh tur leh chil pherh tur a tam thei hle thin a ni.Hengte hi kan khaw thianghlim lohna entirna leh kan hriselna thlengin a khawih pawi thei a ni.VC kan in thlang thar chauh a ni a,heng kan VC thlan thar te hian Ran khuahkhirhna dan hi hei aia khauh zawkin kalpui tum ila a tha hle ang.

Read More

Editorial.8.3.02

Editorial :
            Tawngkam thain sial a man” tih hi Mizo thufing pakhat a ni reng a ni. Mizote hi hetiang lamah hian hma kan sawn mawh khop mai.Tlema nihna kan lo chelh deuh hian biak har deuh leh induh dawn dawna inhriatna a awm thei. Lalngai lo lal a na,an lal a kha tih pawh hi thunei ngai lo leh dinhmun sang ding vak lo ten engemaw vang a thuneihna leh dinhmun sang an han chan hian Engemaw ni ve ta riau hian an in hre thin.Chungmi ang bulah chuan nun hi a hahthlak thin.Vawiin a i mamawh vak loh mihring kha naktukah chuan i mamawh ber mihring a ni theih tih hre reng la. Thian siam nan sum leh pai hi a pawimawh hle nain mite ngaihsak leh ngilnei taka dawr thiamte hian ngainat an hlawh bik a,a daih rei bawk. Tha anga lang thiam, phakar nun erawh hi chuan rei a daih lo thung. Chuvangin mite kan dawrna-ah hian tawngkam ngaihno bei hmang hram hram thiam ila, harsatna eng emaw a awm chang pawh hian “Tawngkam thain sial a man” tih hi i hre chhuak fo ang u.

Read More

Dt 7th. March.2012(Rengkhawpui)

Vairengte Police ten Bike rutu man

            Vairengte,7th.March.2012 : Dt.6.3.2012(thawhlehni) zinglam dar 1:00 vel khan Aizawl lam atanga lo Bike lo chhuk thla CBZ(Black) Mz 01C-4619 chuVairengte Police gate  thlang zawkah lo ti ding in an man ta a ni.
           Vairengte SDPO hnen atanga thu kan dawn danin He Bike bo chungchangah hian Aizawl PS atangin engmah report an la dawng lo a,amaherawhchu Gate chhal zawk a Police duty ho hian zan rei dar 1:00 vel a vai ram lam pan a gGate rawn tlan pel chu ringhlelin Police gate thlanglam phone in an ni ho hian Gate lo kuai hniamin an lo ti ding ta a ni.Police tanan han check chiang chuan Dacument leh Bike chabi pawh neilo in direct- in a  lo tlan a ni.Bike rutu an hi an man lai hian zurim chu a nam vak lo a,mahse ruih nei chu ang hle a ni awm e.He bike rutu hi amain sawi danah chuan Reuben Lalmalsawma,kum 18, Agartala lam chhuak a ni a,Bike a ruk sak hi Imanuel Vanlalnghaka Tuikhuahtlang, 1st Batallian MAP ta a  nih thu kan dawng bawk a ni.Rueben-a hian he Bike hi sunday zan khan ruchhuakin helam kawngah hian a lo tlan thlak pui a ni.Case hi Aizawl PS ah register a ni a,Hetiang a an man tih hriat a nih ve leh hian nimin lam khan Aizawl lam atangin Police pahnih lo chhukin Reuben a hi  Aizawl lamah hruai chho nghal a ni thu kan dawng bawk a ni.Hetiang zan reiah report pawh dawng lova Vairengte Police ten an lo man mai hi an thawkrim hle ani tih a hriat thei a ni.

Vairengte khua leh a chhehvelah Thosi kah beipui thlak dawn.
March leh April thla chhung hian Thosi kah beipui thlak tur a ni a,chumi inbuatsaihna atan nimin khan Nimin khan Vairengte CHC-ah training neih a ni.He trainning hi Medical Officer Pu C.Lalrinchhana leh Supervisor K.Rokima ten kai hruaiin hetiang hian thosi an kah dan turte ruahhmanna neih a ni.Thosi kap tur hian khawchhung mite ruat an ni a,Khawchhung lamah chuan Pi Lalthlamuani leh Nl P.C Lalrintluangi ten an ho dawn a ni.khaw pawn lamah chuan Malaria Programme Worker Pu lallawmkima’n a ho ve thung dawn a ni
Dt12-13.March   - Phaisenah
Dt.15-17.March  - Phainuam
Dt.19.March          - Chhimluan
Dt.21.March          - IOC & Godown
Dt.23.March        - State veng
Dt.26-27.March  - Chhim veng
Dt.30.March          - Field veng &                      Harmon veng
Dt.8.April          - Zalen veng
Dt.11.April           - Bangla veng
Dt.13.April           - Venglai
Dt.16.April          - Hall veng
Dt.18.April          - Venghlun
Dt.20.April          - Tlangnuam leh                              Dinthar
Dt.23.April               - Kawngthar
    Thosi kah chungchangah hian Doctor C.Lalrinchhana chuan mi thenkhatin Khumfa te a ti pung anga sawi a awm thin chu dawt a ni thusawiin,Thosi hlo kah a hi an huat vang zawk a nih thu a sawi a ni.

BDO thar nei.
Nimin chawhma dar 11:00 khan Vairengte SDO(C) chuan BDO Bilkhawthlir hna chu Pu Lalchungnunga SDO(sadar) Kolasib & ASO Kolasib hnenah a hlan a ni.Kolasib-ah emaw Bilkhawthlir ah emaw BDO hi a dawr theih dawn a,Office thut dan tur erawhchu Kolasib D.C Delhi kal lo haw hunah a hriat chian theih chauh dawn a nih tih SDO(C) hnen atangin kan dawng a ni.

T.T board hlan
Nimin khan SDO(C) Pu K. Lalrohlua chuan nikum St.Henry School annual Sport a alo tiam tawh angin Table Tennis Board chu a hlan a ni.Hemi chungchangah hian St.Henry School Zirtirtute chu a chungah an lawm hle a ni tih thu kan dawng bawk a ni.

Ni 7 hlawh lak turah ni 1 hlawh cut dawn
Tuntum MGNREGS hnathawhna  ni 14 thawh tur ah nimin khan VC-I te chuan ni 7 thawh turah ni 1 thawkin ni 6 hlawh an la dawn a,ni 1 hlawh erawh hi chu tuna tui dahkhawmna (tanky) siam mek chhunzawm nan an hmang dawn a ni.Ni 7 dang hi chu hun remchangah thawh leh tur a nih tuh kan dawng a ni

VC-II VCP leh Secretary te Kolasib kal
Nimin khan Village Council-II VCP leh Pu K.Kailiana leh Secreatry te chu Kolasib-ah kalin MLA fund chungchangah D.C an dawr a,heng bakah hian State veng leh Hermon veng ten tui hnianghar zawk an neih theih nan PHE hotute an dawr nghal a ni.

Vawk talhna sawiho
Dt.6.3.2012(Thawhtan) zan khan Hall veng Branch YMA O.B leh SDO ten Vawk talhna (Butcher House) sak that dan tur an rel a ni.

CIJW RAM LAK TUR CHUNGCHANG
CIJW School , Vairengte atana ram lak tur huam chhunga huan, lo ram neitute chu an pass attested Xerox copy, Kolasib DC Office-ah (Original Pass kengin) March 23, 2012 ral hma ngeia thehlut vek tura hriattir an ni a. Hun tiam chhunga Pass/ Permit thehlut lote chuan an sawi buai thei lovang.

Auva Gas connection Chungchang
Inrinni khan Auva Gas Agency te chuan New Connection engemaw zat an pechhuak a,a lawmawm khop mai.Amaherawhchu,Mizofed in Connection a pekchhuah ang tho,Stove,Regulator,Pipe leh Cylender,Lighter leh a tui thunna telin,Rs 3815/- a an tih theih laiin Auva gas Agency te hian Rs 5200( Gas Lighter leh a tui thunna telin) lai an la bik Vairengte mipuiten hriat thiam har an ti a.A Rate list dik tak mipui in hriat an chak hle a ni.Hemi chungchangah pawh hian Consumer Union Vairengte pawhin chhui chian an tum ni a hriat a ni.

Read More