Vairengte,5th.March.2012 : Dt 3.3.2012(Inrinni) zing dar 10:00 khan Vairengte Village Council-II te chuan Meilamsial (Fire Prevention day) Bazar tlangah an hmang a ni.
He hunah hian Pu R.Lalfamkima VCP chu chairman niin Pu K.Kailian’n thusawina hun a hmang a ni. MGNREGS hna kan thawhna kawngah kan harh thar a ngaih zia sawiin ‘He hnathawhna atana thenawmte bungrua kan la hawh sak fo hi sim a hun tawh a ni’ a ti.Huan lo ram leh in leh lo te ti kang lo tur a tan la turin mipuite a fuih bawk a ni.Hemi hnu hian Pu H.K Hmingthanga chuan ‘Ram leilung,thing leh mau leh Ramsa te kan humhalh a ngaih tawh zia leh Ramsa leh nungchate chungah ngaihdam kan dil hial a tul tawh a ni.’ a ti.A ma in sawi dan takin ani tluk a sakap tam hi Vairengte ah hian an awm awm lovang tih theih a ni.Chairman Pu R.Lalfamkima chuan ‘Inbualfai silo a kawr fai hak ringawt hian awm zia a nei lova,Democracy ram a mipuite hi taksa chu kan ni a,kan thinlung kan in siam thar loh chuan VC te thlangin kawr thar ha leh thin mah ila,kan uih thar thar reng ang’ tiin Thinlung thar nen a MGNREGS hnathawhna kalpui thar turin mipuite a chah bawk a ni.
Hetah hian Jobcard holder te an kal tha hle a,hming lamna neiin Huan lo ram nei leh nei lo te thliar fel an ni bawk.Tunkar hun chhung VC-II lamah MGNREGS in hlawhna hi mahni huan ah Meilamsial nan a hmang tur a ni.
Tanpuina pe
Nimin khan Vanapa Section YMA,Venglai branch te chuan an veng chhungah Dam lo Lalchhuanawma S/o Lalduhawmi chu Rs 300/- in an tanpui a ni.Nikum December thla pawh khan hetiang hian veng chhung a tanpui ngai leh damlo harsa zualte hnenah tanpuina sum an lo pe tawh bawk a ni.MGNREGS hlawh la dawn
Tunkar hian January leh February thla in hlawhna chu sem chhuah a nih tur thu DRDA lam atangin thu kan dawng a,tunthla inhlawhna tur pawh tih fel vek a ni tawh a ni.Thosi kap dawn
Medical Officer Pu C.Lalrin chhana hnen atanga thu kan dawn danin tunkar chho hian thosi kah a ni leh dawn a,amaherawhchu khaw chhungah kap hmasa lovin kan khaw chheh vel Phainuam,Phaisen leh Buhchang khua ah te kah hmasak a ni dawn a ni.Tin naktuk hian Thosi kap turte hian training an nei dawn a ni.kan damdawiin pawh tih changtlun zel a ni a,rawng pawh hnawih that mek a ni.SDO(C) in vote V.C-I chhiartute kokhawm
Inrinni a kan lo chhuah tawh VC-I election complain chungchangah zitawpni khan SDO(C) (Observer) chuan Counting official-te hnenah complain a awm thute hrilh hriatna a nei a,Election thil a mawhphurna leh Integrity vawng nung turin a fuih a ni.Chhiar that anih leh nih loh tur chungchang engmah thu chiang a la awm loh thu kan dawng bawk a ni.Election Commission Hriattirna
Election commission chuan thuchhuah siamin VC inthlanna a Poster leh Banner tar zawng zawng te pawt thla a ti reh vek vek turin Candidate-te a hriattir a,thupek zawm lo chu dan ang a hrem an ni dawn a ni a ti.VC-II VCP thut hun
Mipuite tana rem chan zawk beiseina avangin VC-II,VCP Pu R.Lalfamkima chu Office ni ah chuan zing dar 6:00 atanga 8:00 a.m ah VC-II House ,Zalen vengah a thu dawn a,Tlailam dar 3:00 atangin 4:00 p.m thlengin IOC lamah a thu chho ve leh dawn a ni.He mi hun chhung hian VCP dawr theih a ni dawn a,VC memberte pawhin an tawiawm dawn a ni.Hemi bak a mimal ang a hmu duh pawhin inlamah a dawr theih dawn a ni.Hydel Project chungchang
Tun Inrinni khan Assembly Speaker Pu R Romawia'n Tuirial Hydel Project hnathawh kalpui mek chu a hmunah a tlawh a,Speaker hi Tuirial Tuikhuah hnathawk tu NEEPCO Gen.Manager leh Head of Project ni mek M.Kaikhawmao in lo dawngsawngin an hnathawh kalpui mek chu lo hrilhfiahin Tuikhuah anih hma a, Luitui lakpenna tur Tunnel an siam mek chu a hmunah kalin an en a, M.Kaikhawmao chuan Tuikhuah hna hi 30% vel thawh anih tawh thu sawiin, tun dinhmunah tuikhuah hna chu tluang takin kalpui mek anih thu sawiin harsatna an tawh lem loh thu speaker hi alo hrilh.A harsatna ber lung lak chungchang pawh lo bawh zui a tiam a ni.BDO thar nei dawn
Bilkhawthlir BDO leh SDO(C) ni bawk Pu K.Lalrohlua chuan naktuk thawhlehni hian BDO hna chu Pu Lalchungnunga hnenah a hlan dawn a,Vawiin tlai hian inthlahna hun an hmang dawn a ni.Pu K.Lalrohlua hi Vairengte SDO(C) a la ni reng dawn tho a ni.Internet-ah en thei dawn
Kan chanchinbu Rengkhawpui Daily newspaper chuan Blog thar a nei a.He site,http://rengkhawpuidaily newspaper.blogspot.in-ah hian lutin kan chanchinbu a chhuak tawh ho a en let theih dawn a ni.Thangthar ten,kan khua hian eng chanchin nge kan nei ve reng tih an en let thei tawh dawn a ni.
