Rengkhawpui 3.4.12

Kum 2011 March atanga 2012 March thlenga Vairengte Excise ten ruihhlo an man dan tlangpui

    Vairengte.3rd.April.2012 :Vairengte Excise &Narcotics Department ten  kum 2011 March atanga 2012 March thla thlenga  an record danin  Zu umpuitling 60752 manin,Damdawi leh Zu Case hrang hrang avangin mi146 vel an man bawk a ni.
              Heng bakah hian Zu hi a Half (Bottle) Um 211, Quarter  um 71 ,Beer Um puitling 128 leh Canned beer Um 260 an man a,Rakzu (Local) 53 litres an man a,Dawidim 10Kg manin, Damdawi lamah chuan Parvon Spas mum 92975,Proxyvon mum 6723, Alprozolam mum 661, Nitrozepam mum 4744 leh Tefa mum 454729 te an man bawk a. Tin,heng bakah hian No 4 leh thil dang leh Ganja 31Kgs leh a chanve pawh an man tel bawk a ni.
    Heng ruihhlo an mante hi a tlangpui in lirthei atanga man an ni a,chung lirthei hrang hrang an man dan tlangpui chu hetiang hi a ni.Auto Rickshaw -11,Truck-12,Bike-2,Maruti -2 leh Gypsy-2 atangte in a ni.
    Vairengte Excise O.C hnen atanga thu kan dawn danin ruihhlo an mansak zingah hian mizo an tam ber a,hnam dang thenkhat an tel ve bawk a ni.Ruihhlo an man zingah hian   Auto Rickshow atanga man ho hi Vairengte mi anni tlangpui a ni.Vairengte Excise te hian khawtlang mipuite nen a thawhhona tha tak neih an duh a,chutihlaiin an hnathawhna kawngah hian mipuite pawhin tawiawm tha turin an duh a ni.

NGO Co-ordination Committee hruaitu thlang dawn
Dt.3.4.2012 Zanin dar 7:00 p.m hian Primary School-I,Bangla veng ah,Vairengte NGO Co-ordination Committee-te chuan kum 2012 -2013 atana hruaitu tur thlanna neih tur a ni a.He inthlannaah hian YMA Branch hrang hrang atangte,MHIP Branch hrang hrang atangte,MUP unit hrang hrang atangte,MZP Sub-Hqrs atangte,HSA atangte,MSU Hqrs atangte leh SORE atangte in Vote an nei theuh dawn a,Vairengte Co-ordination Committee in hriattirna a pek ang khan,rawn tel theuh turin beisei leh ngen kan ni e.
    Vairengte Khawtlang hruaitu tur thlanna anih dawn avangin akal thei tur chu a kim thei ang ber kal tum theuh turin kan ngen che u a ni.
General Secretary
Vairengte Co-ordination Committee(VCC)
Vairengte

HRIATTIRNA
Chite phai a Bawng thi awm thin report leh tlangkam atanga hriat bawh zui nan A.H & Vety Department chuan Ni 4.4.2012 (Nilaini) chawhnu hian Verification neih tura a hmun a tlawh turin ruahmanna a siam a,Chite phai bawng neitute bawng thi chungchangah report emaw sawi duh nei chuan Ni 3.4.2012(Vawiin) chawhma dar 10:00 atanga chawhnu dar 12:00 inkarah AH & Vety Office Zalen vengah in report tur a ni.
    Tin,Chite phaia bawng thi neitute verification hunah hian a hmunah lo awm tura ngen leh hriattir in ni e.
(Dr.K.VANLALPEKA)
Veterinary Officer,
Vairengte.
Contact.9612112112/9402322231

Motor ruk tum man
Vairengte Police te chuan Dt.31.3.2012 (Inrinni) zan khan Bolero ruk tum ni a rinhleh mi pakhat an man a,nimin khan Vairengte O.C leh Bilkhawthlir O.C ten hemi chungchang bawhzui hian Phainuam leh Lailapur bawr velah an zuk kal a.Tuna an kawl mek hnamdang (Sumo Driver) hi he Bolero ruk tumna chungchangah hian a inhnamhnawih ngei a ni tih finfiahin,vawiin lamah hian Case siam sak tur niin Kolasib Court lamah an thawn chho dawn a ni.

Camping-ah lut tha hnem
Vairengte Presbyterian Kohhran a Chhandamna Camping chhawng hnihna neih mekah Campers an lut tha hle a,nizan dar 7:00 vel thleng khan hmeichhia 173 leh mipa 229 an lut a,Camp a lut zawng zawng hi an vaiin 402 vel an ni.He Camp a rawn luh tum thenkhat te pawh an thathnem tawh avangin a lehpek a lut tura an lo tihte pawh an awm bawk a ni.

Motor in a chil inrem
Vairengte Police Station atanga thu kan dawn danin Inrinni zan a N.Chhimluang mi Lalrohlui kum 32 D/o Liankhuma(L) Truck MH46F-1585 in a ke ah a  chilsak chungchangah nimin khan Vairengte Police Station ah Driver hi inpe in,Lalrohlui te nen hian inremna an nei a,Driver hian Lalrohluii in enkawlna tur atan Rs 20000/- a pe a ni.

Multipurpose Hall chhunzawm
Nimin zing khan Multipurpose Hall Sub-Committee te chuan Pu Sangbuanga,Zalen vengte inah Committee an nei a,Multipurpose Hall an siam mek chu a chung Slab siam nise an ti.

VC -II Sitting a thurel thenkhatte
Village Council-II te chuan VC House ah Sitting an neihna a  an thurelte bawhzuiin nimin khan Aitlang Hermon vengah kalin ram ruakte an endik a, in hmun diltu mi 18 te zinga  mi 9 te chu pek tlakah an ngai a,zirchian ngai leh thlir let ngai hi mi 4 an awm a,mi 1 hi Special case angin an dah a,mi 4 te dilna chu an hnawl a ni.Tin,Hermon vengah hian PHE in tui a pek theih hma chu temporary a tui connection siam an tum a,heng atana hman tur pipe hi hun remchang hmasa berah lei an tum a ni.
    V.C inhlawhna dan tur  chungchangah inhlawh duhten anmahni bialtu VC hnenah in report tur a ni a,in report te atang hian  inhlawhna a awm pawhin a in chhawkin an inhlawh thin dawn a ni.

Posted in: (2012),Tualchhung