Mizo Kristian ten kumkhat chhung a kan hunpui ber Krismas leh kumthar lawmna chu kan khaw tlangah thihna te thleng zeuh zeuh mahse harsatna leh buaina lian lutuk awm lovin kan lo hmang liamin kum thar 2015 kan lo chuang kai leh ta hi a lawmawm tak zet a.A hmasa in Rengkhawpui chanchinbu chhiar thintu zawng zawng te kumthar chibai kan buk a che u. He kumthar ah hian Vairengte mipuite hian kan rilru te a thara siamin kan khua hian kawng hrang hranga hma a sawn theih nan leh sualna pung mek te tih rem a nih theih nan thawhho dan kan zawn thiam a tul hle awm e. NGO pawl hrang hrang te pawh in kan theihna zawn theuh ah Vairengte tan tiin hma thar la tlang ila, kan pawl tih len tum leh tih lansar tum lam aiin khawtlang mipuite te tan hma thar ila ho teh ang u. Kum hlui lamah kha MLA inthlan kum te a nih angin party hrang hrang te kan in bei tawn theuh thin a. Tunah erawh khang hun kha liam tawhin eng party te pawhin khawtlang hma sawnna tur a nih dawn phawt chuan thawhho hreh lo i la. Tin, tlawm ngai pawl YMA te pawhin ruihhlo hi tha hnem ngai takin do zui zel thei sela, chutihrual in YMA kan nih angin tanpui ngaite tanpui turin kan rilru hi siam thar ila, Mizo tlawmngaihna dik tak vawng nung zelin chan tha leh dinhmun tha a lo awm pawhin ‘kei nilovin nang zawk le’ ti thin kan pi leh pute nun ze mawi tak kha i chhawm nung zel teh ang u. A tawp berah chuan khawtlang mipuite hi kan pawi mawh ber a,heng NGO pawl hrang hrang leh party te hmalakna hi a taka tihhlawhtiln a nih theih nan chuan kan khawtlang hruaitute kawng engkimah kan tawiawm a, an tih dik lo a awm anih pawhin tha taka sawi chhuakin hma i la tlang teh ang u.
0 comments:
Post a Comment