Khawlum tak hnuaiah tunlai a thuhriltu sawi hlawh ve tak, James a'n vântirhkoh hnên atanga pawisa a dâwn dan vel social media hrang hrang a fiamthu nan a an hman te ka lo thlir zawh chiah vang nge ni chutia khawlum avanga ka lo mutlu chu mi pakhat, Eng deuh pup a hmel hmuh theih silo hian, *'lo kal la, thil mak leh ropui in thup nilo, thil ho leh ropui lo tak ka hmuhtir ang che,'* tiin min rawn ko thut mai a. Kei pawh chu tho hlim hlawh e ti lo chuan thil ho lam nuih tur zawng ta reng reng chuan i he lovin ka zui ve ta nghal a.
*Kum 2099 May ni 11 :*
Chutia "lo kal rawh" a tih vanga ka zui ngawt chu hmun dang lam tak, ka dam chhûnga a taka ka la hmuh miah lohna hmunah min hruai in chumi chhûngah chuan kan mizo naupang, fai leh hmeltha tak tak mai te chuan an zirtirtu hovin thiamna sang zêlin a chhawm hmanraw tha tak tak te nên zirlai an lo zir mek alo ni a. An classroom chu en vel pahin a nuamin a thianghlim si a, bang lam ka han en chuan, ka sawi thiam ve danah digital calendar an tarah chuan Date.11th May 2099 tih a lo lang kulh mai ka han hmu chu ka phu deuh dawr a. Chutihlai tak chuan min hruaitu pa chuan 'ngun takin an thil zir hi ngaithla rawh', min lo ti a.
An zirtirtu hmelfel leh zaidam, finhmel leh a hna tui hmel tak chuan zirlai te zawhna a lo zawt mek a. *"Kum 2020 leh 2021 vel a Mizoram history a, a hun lai hri hlauhawm tak leng a an ngaih chungchang ah khan sorkar leh mipui ten enge an tih dik loh'* tiin kil khat lo thu, naupang tarmit bun, lehkhabu lo bih mek chu a zawt a. Chu naupang kum 12/13 rual vel lek chu lo ding chhuakin, *'kum 2020 leh 2021 a Mizoram sorkar in a hunlai hrileng hlauhawm tak ni a an hriat, covid-19 hri chungchangah mipui leh sorkar in a tih dikloh lian tak tak te chu point li (4) fel takin a then theih a, chûngte chu;*
*1. Sorkar in a hunlai a mipui mitin ten an hman theih social media hmangin thu leh hla puanchhuah nan a hmang nasa a. A ram chhûng journalist te ring zo lo leh sorkar hnuai a Information & Public Relationship Dept ten journalist te ngaihthah lui a, social media a engkim sorkar thu a tarlan vang a ni a. Hei hi a chhan pawh mipui mimir in social media thu post leh kaihlek an thiam ve vek vang leh a him chin tur an hriat si loh vang te, thudik loh leh inbumna thu thleng a thu an post nasat vang te, sorkar ber pawhin social media thu post a ngaih thutak lutuk vang te, mipui tih ṭhaih zawng a thu ziak in thawn kual nasat lutuk vang te a ni.*
*2. Mizoram sorkar in a hun lai a mithiam a tih zingah he hri hlauh vanga buai an tam lutuk leh hêng mite thu a ngaichâng nasa lutuk kha a ni a. Khawvel danga kha hri in a hnathawh dan te thlir chungin hlauhna nen sorkar nawr kal a ni kha an tihsual lian tak a ni bawk.*
*3. A hun lai social media khawihtu mipui ten an thu hriat ang ang, khawvel hmun danga kha hri in mi a tihhlum dan an hmuh te an inthawn darh kual vak vak khan mipui ah hlauhna dik lo a siamin Mizoram chhungah kha virus hnathawh dan en lova ram dang leh state danga virus hna thawh leh thil thleng an en tam a, dawt leh belchiang dâwl lo thleng a thu leh vedeo an in thawn kual tam vang a ni a, chung ang chu Mizoram ah a thleng ve dâwn tlat a an hriat vangin hlauhna in mipui rilru ah bu a khuar nasa a, kha khan kawng dik lo an zawh phah in Mizoram history a hun thim ber ( Dark age) ti a chhinchhiah anih phah a ni.*
*4. A hun lai a mizo Kristian zingah zawlnei in ti lo pun tak hluai vang pawh a ni a. Khang zawlnei in ti te khan ram chhiat tur thu leh zoram thar thu aupuiin a hun lai mipui te khan an beng a khang thu a luh hnem em avangin khang hri leng kha hremna leh chhiatna thleng ve reng tur, an thihpui teuh tur ah ngaihna an nei bawk a. Sakhuana hmangin mipui tihṭhaih an awm bawk vang a ni.*
*A chhan bul pui ber chu a hun laia changkang an tih ve em em social media hrang hrang,sorkar leh mipui ten an hman dikloh nasa lutuk vang a ni. Heng lo pawh hi thil tam tak a chan leh vang a awm"* ti a sawi zawm leh a tum lai tak chuan, an zirtirtu chuan i thiam hle mai, khatah khan duh tawk phawt ang, "thu rawh le", tiin alo pawt chat a. A thil sawi chuan min tiharh zawkin sawi belh tur a va ngen ka tum lai tak chuan min hruaitu chuan ka dârah vuan in kan mutna ngai ah min lo dah leh ta daih a. A ni chuan, *'hêng ka thil hmuh tîr che hi tumah hnên ah sawi darh lo la, mahse nang chuan social media leh i duh duhna ah i lo thehdarh dâwn nia min ti zui a..'* Biak tuma ka an lai tak chuan Zawhte miau vak ri ka hria in ka harh zâwk a, ka lo muthlu chuan kan Zawhte ka lo delh bet ṭe ri niin ka mumang erawh ka rilru ah a awm zui ta reng thung a ni.🤫🤔🤔
0 comments:
Post a Comment