Dt.10.9.2021 khan Dr.H.Lalthlangliana, Deputy Commissioner, Kolasib chuan Phainuam, Buarchep tlang, Saihapui ‘V’, Aitlang (Darthanzauva huan leh Aitlang Pui) leh Vairengtea Police duty-na hmunte tlawhin Police duty dan dinhmun leh ramri hrula hmalakna thenkhat a endik nghal a. Pu Vanlalfaka Ralte, SP, Kolasib, Pu Vanlalmuana Fanai, EE, PWD, Kolasib Division leh Pu Isaac C. Lalrempuia, SDO(C), Vairengte te an tel bawk a ni.
Dr.H.Lalthlangliana chuan nimin lama an kawng laih, Assam Police ten an lo complaint chungchang ah Rengkhawpui zawhna chhangin thu in hriat fuh loh vang ni a sawiin harsatna an neih zui loh thu a sawi a ni. DC hian ramri hrula Police duty-te fuih tharna hun hmangin ram ven hna chu inpekna thuk tak nen a kalpui a tul thu sawiin ralthuam tha aiin rilru paukhauhna leh huaisenna a pawimawh thu a sawi a. Hma an lo lak tawhna leh an duty kalpui dan chu lawmawm a tih thu tarlangin ram tan a penchhuak an nih ang tak a thahnemngaihna nen an hna thawk zel turin a fuih a, Aitlangah hian thing a phun nghal bawk a ni.
DC, Kolasib chuan ramri hrul Police duty-na hmunte a tlawh zawh hian Vairengtea NGO hrang hrang hruaitute nen inkawmna hun a nei leh bawk.
0 comments:
Post a Comment