Nimin chawhnu khan Kolasib DC Dr H. Lalthlangliana hovin DC Conf. Hall ah Covid-19 dona kalpui dan tur leh a kaihhnawih thil pawimawh dangte sawiho ani. Sorkar in inkaihhruaina ni 19.4.2021 a a tih chhuah chu meeting ah hian thlirho in, a theih chin chin ah tha taka kalpui a, mipuiten an zawm theih nan hmalak nise an ti. Dr H. Lalthlangliana chuan, contact tracing ngaih pawimawh a tul thu sawiin, phai leh hmun dang atanga Mizoram a lo haw te lakah inkaihhruaina tha taka kenkawh tur a ni a ti a, Covid-19 Screening point a test tawh te chu an result a chhuah hma chuan khawiah mah kal sawn tir loh tur a ni, a ti. DC chuan, hmun thenkhat ah inkaihhruaina thar a chhuah avanga lock down anga ngaia mahni hna a kal tum lo sorkar hnathawk zingah an awm chu pawi a tih thu sawiin, DC chuan lock down emaw curfew emaw puan a awm loh avangin sorkar hnathawk, a bikin office leh bank a thawktute chu mahni hnaah theihtawp chhuah a thawk theuh turin a chah. DC chuan Covid-19 dona kawnga thawktu hrang hrangte chu mi dangte lakah tawngkam mawi leh ngaihthlak nuam hmang thin tura chah in, Covid-19 inkaihhruaina te tha taka zawm turin mipuite a sawm a, mipuite awmdan a zirin lockdown/ curfew puang thut thei kan ni, tiin, kan inthununna a that chuan puan kher a ngai lo thei bawk, a ti. Meeting ah hian State dang atanga Mizoram a rawn lut te Vairengte leh Bairabi ah dan pangngai angin Screening kalpui chhunzawm reng a nih thu leh Saiphai ah ningani apiangin chawhma dar 10 atanga tlai dar 4 leh Phaisen ah nitin chawhma dar 10 atanga tlai dar 3 inkarah Covid-19 Screening kalpui anih thu DC chuan a sawi bawk.
District Magistrate Order
Covid19 dona chungchanga Village Level Task Force (VLTF) te hriat tur leh tih turte :
Covid -19 hridarh nawn leh (2nd wave) mek ah VLTF tin ten mawhphurhna hrang hrang kan neih thin bakah a hnuaia mite hi ngaipawimawh zual turin kan in ngen nawn leh e.
1. Contact tracing: Covid-19 Positive an awm reng reng in an chenpui leh an khawsakna hrang hrang a hri an kaichhawn palh theih (Contact) a rang thei ang ber a list siam a, an phone number-te nen Contact Tracing Team-ah report vat tur a ni a. Heng list-a awmte hi midang nen inpawh buai lo tura an mahni In theuhah lo khung hran rih tur a ni. Contact Tracing Team in report na tur hi mahni veng tina Health Worker-te an ni a, an ni hi biak pawh theih an nih loh pawhin District Contact Tracing Team Phone No. 8974768597/ 9774368477 - ah an report ang.
Hemi chungchang hi mahni Zonal Magistrate-ah theuh report bawk tur a ni a, Zonal Magistrate ten Contact Tracing Team nen inrawnin Containment Zone-a puan tur leh tur loh chungchang chu District Magistrate-ah recommendation an siam thin ang.
Khawdang atanga mahni venga luh emaw, mahni veng atanga zinchhuah emaw khap phal a nilo a, a tul zualah chauh lo chuan zin chhuak lo tura inngenna erawh siam phal a ni.
Veng chhung Curfew emaw Lockdown leh Containment Zone-a puan hi District Magistrate chauhin tih tur a ni.
2. Mikhual chhuak leh lut chungchang: VLTF tinin mahni veng chhunga mikhual lut leh zinchhuakte an hrechiang tur a ni a. A chhinchhiahna tur lehkhabu D.C Office atanga sem tawhte hman tangkai tur a ni.
Veng dang atanga mahni venga lo luh khap ngawt theih a ni lo va, chutih laiin veng dang atanga lo kal te an phone no. nen lo chhinchhiahin positive contact an nih theih leh theihloh hriat chian lo tum tur a ni a. Chutiang ang rinhlelh an awm a nih chuan a rang thei ang ber in Contact Tracing Team-ah report tur a ni.
Mikhual kan tih zingah hian hnamdang hnathawka kan chhawr te pawh a huam a, State dang atang a lo lut an nih phei chuan fimkhur leh zual tur a ni.
3. Self Monitoring/Home Quarantine chungchang: State pawn atanga lo hawte dawnsawn dan tur Self Monitoring/Home quarantine chungchangah Order chipchiar taka siam a ni tawh a, hemi hi uluk tak a chhiar nawn leh theuh a, zawm nise. Hemi chungchangah hian mahni veng zin lo hawng te an mahni Ina Home quarantine chhung hi Ni 7 a ni a. Hemi chhung hian pawn lam ah chhuah loh tur a nih bakah midang pawh an inah lenluh remtih loh tur a ni a. Ni 7 hnuah damlohna hranpa an neih loh chuan chhuah theih a ni a, an chhuah dawn ah Ni 7 quarantine hun an zo tawh ani tih certificate pek ngei tur a ni ang.
Self Monitoring/Home Quarantine chhung hian Covid-19 symptom hritlang, khuh, khawsik etc an neih leh neih loh VLTF ten enthlithlai pah tur a ni a. Hetiang nei emaw rinhlelh emaw an awm a nih chuan Contact Tracing Teamah an report vat tur a ni. Home Quarantine laiten an taksaah harsatna an tawk a Damdawi In pan an duh emaw, mipui mimir Covid19 kai inringhlel an awm a Damdawi In pan an duh chuan VLTF te hnenah an in report ang. VLTF ten hei hi lo buaipuiin Ph. No. 9862266830-ah report vat tur a ni. Mahni thu-a Damdawi In pan phal a nih loh thu mipuite hrilh hriat tur a ni.
4. Bazar chungchang: Kolasib, Vairengte, Bairabi leh Kawnpui bikah te chuan chawhmeh leh thildang zawrhna Bazar chhung ah mipui tam lutuk an punkhawm loh theih nan VLTF ten ruahmanna tha tak siam theih nise. Hei bakah hian hnamdang nitin mamawh leh bungraw phur ten dawra an unload chungchangah kaihhruaina an zawm em tih an lo thlithlai nghal bawk tur a ni a. Dan zawm lote chu Zonal Magistrate ah an report thin tur a ni.
5. Puipuina hrang hrang khuahkhirh chungchang: Inkhawm phal a ni lo va, Zirna in leh puipunna hrang hrang, heng; Picnic Spot, Stadium, Public Park, Restaurant, Shopping Complex leh intawllenna hmun hrang hrang hawn phal anilo bawk. Hetiang hmun hi hawng leh dan bawhchhia an awm chuan VLTF ten mahni veng huamchhung theuh lo thlithlai in tilo turin an hrilh tur a ni. Dan bawhchhe lui an awm chuan hremna pek an nih theih nan Zonal Magistrate ah an report vat tur a ni.
Puipunna dang, Inneih leh Mitthi vui naah mi 30 aia tam awmkhawm phal a ni lo va, ei leh in sem phal a ni lo bawk. Hemi chungchangah hian VLTF ten mahni huamchhung theuh mipui zirtirna lo pein an hrilh hre tur a ni. Dan bawhchhiatna a awm chuan Zonal Magistrate ah an report tur a ni.
6. Mipui pawn chhuah chungchang : Tul lova pawna chhuak tam lo turin mipui hnenah inzirtirna pek tam leh nise. Mahni eizawnna hrang hrang erawh tha taka chhunzawm theih nan hma lak theuh tum tur a ni a. Heng kawngah pawh hian Social Distancing leh Mask vuah zirtirna inpek tam tur a ni. Hmun danga zin chhuak tur an awm chuan an kal tanna khua leh an kalna tur hmun ziakin Zonal Magistrate-in emaw VLTF-ten emaw ziakin permission an pe thin ang.
7. Mipui hnena zirtirna: VLTF ten mahni huam chhung theuhah aurinna emaw, tlangau emaw hmangin mipui hnenah uar zawk a zirtirna pek tum theuh tur a ni a, hetah hian heng thu te hi sawi uar nise:
a. Tul lova pawn a chhuah loh chungchang.
b. Social Distancing, kut silfai leh Mask vuah chungchang.
c. Tul lova zin chhuah tam loh chungchang.
d. Mahni theuh inven fimkhur a pawimawh zia chungchang.
e. Covid Vaccine lak theih hunah a tam thei ang ber la tura inzirtirna
f. Hmun dang atanga lo lut te VLTF te hnen a in report leh hrilhhriat.
g. Covid -19 chungchang a in zirtirna tul apiang.
h. Self Monitoring-a awm turten khaw chhung an luh hma ngaiin an awmna tur VLTF te an hrilh lâwk ngei tur a ni.
Mipui Zirtirna hi tawngkam mawi leh dam deuh a inzirtir nise. Tawngkam dengkhâwng leh mi rikrapna ang chi te, mipui ti thinthawngte pumpelh hram hram tum tur a ni.
0 comments:
Post a Comment