Vairengte Police-ten Luruh ro an chharna hmun atangin ruh dang hmuh belh,Garage a kangmei ti chhuaktu man..
Vairengte 2nd.March.2012 : Vairengte SDPO hoin Nimin zing dar 10:00 atanga tlai dar 2:00 in kar khan Luruh ro an chharna hmun bul sihal kua chu laiin, hmanni a luhruh ro an chhar tak khabe leh ha te hmuh belh leh a ni.Feb.23th a Vairengte Auto stand chhak Bung thing thlang a luruh ro an chharna hmun chu nimin khan ahmun hmate ennawn leh a ni a.SDPO ho hian police tha hnem tak leh Lailapur a vai thenkhatte nen luruh an chharna mual zawng zawng an zawng chhuak a ni.Luruh an chharna bul Sihal kua chu laiin feet 3 vel a thuk an laih hnuin Lu ruhro khabe ruh leh a ha te an laichhuak ta a ni.Heng baka a taksa bung dang ruhte a awm ringin a hmun hma mual zawng zawng an zawng chhuak leh vek a,amaherawhchu heng bak hi thil dang an hmuh belh lo a ni. SDPO hnen atanga thu kan dawn danin Lailapur vaiin an zawn ve nachhan chu nikum november thla khan Vai rawlthar kum 16 bawr vel,Vairengte a kuhva lo a lokal chu chin hriat lohvin a bova.Hepa chhungte hian tunhnaia luruh an chhar leh takah hian amah anih ringin a ruhro hi an zawnpui ta a ni.Heng Khabe ruh leh a Ha ruh an hmuh belhte hi Vairengte Police Station-ah kawlin Forensic expert lam hnen ah an thawn leh dawn niin thu kan dawng a ni.
Tin,Nimin lama kan tarlan tawh Pu T.Lalrinsanga Garage a kangmei chhuak chungchangah khan nimin khan mi pahnih Ngurremsiama, (kum 23) S/o Ngurchungnunga leh Rohmingthanga (kum 23) S/o Vanlalhlira,Zalen veng ve ve te chu man a ni a,an ni hian petrol ruk an tumna lamah Garage hi an ti kang ngei a ni tih an inpuang a ni. Nimin chawhma dar 11:00 vel khan Kolasib Court lamah an thawn chho nghal a ni.
V.C-I lamah inthlan Complain
Feb.23rd Village Council inthlanna a VC-I lamah Congress Candidates thenkhatten Vote chhiar that leh SDO(C) (Observer) hnenah an dil a,Hemi chungchangah hian SDO(C) chuan inthlanna ballot paper-te Kolasib lamah thawn chhoh a nih tawh thu leh Kolasib lamah Complain theh lut turin a lo rawn a ni.Nimin lam khan kolasib lamah lam kal an in tir niin a thu dawn a ni.He thuchhuah lai hian eng tin zel nge an kal pui dawn hriat a ni lo a ni.
MGNREGS hlawh la hnai
BDO hnen atanga thu kan dawn danin MGNREGS Janaury leh JFebuary inhlawhna chu a rual a lak tur anih dawn a,engkimtih fel vek a ni tawh a,amaherawhchu vawiin hi office chawlh a nih avangin karthar lamah hlawh hi a lak theih dawn a ni.Tin,March thla inhlawhna tur ni 14 pawh a lo thleng tawh a,hei pawh hi thawh theih a nih nghal tur thu a sawi bawk a ni.
Trade & Commerce Director lokal
Nimin khan Trade & Commerce Director Lalzirliana chu Vairengte a Market Building sakna tur a hmunah a lo enfiah a,He Market thar sak nan hian Nuai 350 bawr vel Estimate siam a ni.Thu dawnna in a sawi danin Tuna bazar hmun hluiah hian sak a ni dawn a ni.
Sanctuary-ah kal dawn
Joint YMA-te hruaitute chuan Vawiin leh naktuk hian zan riak a Sanctuary-ah demarcation neih leh an tum a, Hetah hian Joint YMA Committee member zawng zawng te chu kal vek an tum a ni. zing dar 9:00 ah Chhim veng YMA run kawtah innghahkhawm tur a ni ang.
VC-II Seating nei
Nimin tlai dar 3:00 khan VC-II lam ten VC House a Seating an nei a,hetah hian Secretary atan Pu Lalzarliana,Field veng chu ruat a ni a,tlai lamah hian chawhlui kil hona an nei nghal a ni.
VC-II VEC thukhawm dawn
Vawiin zing dar 7:00 hian VC-II lam VEC(Village Employment Committee) te chuan VC House-ah Meeting an nei dawn a,hetah hian March thla atana MGNREGS ni 14 inhlawhna lo kal tur thawhna dan tur chungchang an sawi ho dawn a ni.
MNF North Group ten VC Tlingte lawmpuina nei
Nimin chawhnu dar 1:00 khan Comunity Hall-ah MNF North Group ten Dt 23.Feb. VC election a,MNF ticket a VC tling thar te lawmna hun Programme an hmang a,He tah hian VC tling tharte leh tling zo ve ta lo te pawh chawimawina pangpar thi an awrh tir a ni.V.C tling tharte hnenah hian Certificates hlanna an nei bawk.Block hruaitute pawh an kal tha hle a,mi hrang hrang hnen atangin thu sawi ngaihthlak a ni.
Magistrate in tan tir
Nikum September thla a Vairengte a mi kawt a naute hnutchhiahtu Vairengte Police in an man Lalthanpuii chu Kolasib Court Magistrate chuan Thla ruk tang tur leh Rs 2000/- chawi turin a ti a ni.Mahni fate ngaihsak lo a enkawl zui duh lo hi dan hian a hrem thei a ni.
Inbuatsaih nasa
Tunlai hian YMA Branch hrang hrangte Serlui Group Conference lo awm tur inbuatsaihna atan Joint YMA ten ni 10 atanga intihsiakna a siam turah lawmman lak ngei tumin tan an la tlang hle a,nizan khan kan hriat theih chinah Venglai Branch leh Field veng Branch te chuan intihsiakna a Items turte an zir a ni.Venghlun Branch-te erawhchu KTP General Conference zawh lamah an zir zawm dawn a ni.
Kemahni
Thla thar kan lo chuan kai leh ta a,Febuary thla chanchinbu man kan lo khawn dawn a,Febuary thla bik atan hian Rs 40/- a ni ang.Subciber zawng zawng ten khawngaih a chanchinbu man lo pe theuh turin kan ngen che u a ni
0 comments:
Post a Comment